【行為藝術】99部手機塞死Google Maps交通
揸車人士，好多都識得睇 Google Maps 實時交通狀況，避開啲交通擠塞地段，確保路路暢通。不過，德國就有藝術家利用 Google 收集資訊嘅漏洞，自製交通擠塞狀態，雖則應該無乜人會咁無聊，但真係 work 㗎呢招。
https://youtube.com/watch?v=k5eL_al_m7Q%3Fwmode%3Dtransparent%26rel%3D0%26feature%3Doembed
Google 收集交通狀況嘅方法，相信好多人都知，其實 Google 都係透過收集大量手機喺道路上嘅定位資訊進行分析，一旦發現有大量手機喺同一條馬路上緩慢前進，就會認為交通狀況出咗問題，於是喺地圖上顯示黃色或紅色狀況。除咗俾用家睇之外，亦會應用喺導航系統，幫助用家選擇最順暢嘅路線。
德國藝術家 Simon Weckert 就係用呢個漏洞，自製交通擠塞。方法好簡單，首先佢收集咗 99 部智能手機，開著晒佢哋嘅位置分享功能，然後將呢堆手機放晒喺手推車內，之後就拖住呢車手機喺條馬路中心漫步，結果真係 fake 到 Google Maps，成功令條馬路染紅。Simon 仲專登拍埋片見證呢次行為藝術嘅過程，同埋喺佢嘅造假下，點樣令到 Google Maps 改變導航路線建議。
其實諗真啲，如果想令目標人物根據自己擬定嘅路線行走，真係有可能用呢招達成目的喎，唔知呢條橋遲吓會唔會喺《特務戇J》之類嘅低俗特務劇入面出現呢？
相關文章：【玩穿越】日內瓦車展 2019 定位錯晒
