【Telegram都出事？】北韓黑客偷加密貨幣開發核武
我已經用咗 Telegram 四年，初初用嘅時候，應該唔係咁多本地朋友識得佢，但因為有好多外國朋友用緊，為咗同佢哋聯繫先至裝，仲一直用到而家。其實起初用都唔知佢保安能力咁強，都係後嚟睇報導先知，不過佢的確有好多方面設計好過其他通訊軟件，用用吓就愛上咗。
不過，最近保安公司Kaspersky Labs 就話，Telegram 原來都唔係百分百安全！事緣佢哋調查後，發現北韓一個專為政府效力嘅黑客組織 Lazarus Group，由 2018 年開始發起咗一個名為 Operation AppleJeus 嘅行動，喺 Telegram 開咗一堆加密貨幣交易群組，同埋整咗一堆假嘅加密貨幣網站。唔小心撳咗入去網站，或者加入咗呢啲群組，點擊咗其他人發出嘅連結，就有可能中招，俾人喺你部手機度裝病毒程式，令黑客可以偷取手機入面嘅用戶資料，甚至偷走受害人嘅加密貨幣，暫時知道英國、中國、波蘭同埋俄羅斯都有人中招。Kaspersky Labs 仲話佢哋發現黑客不停轉換犯罪手法，而且愈變愈複雜，增加咗偵破嘅難度。
研究人員 Kayla Izeman 舊年接受英國《獨立報》訪問時，已經話北韓黑客近年都將焦點放晒落加密貨幣，因為面對各國經濟制裁，加密貨幣已經成為北韓用嚟搵錢嘅一大門路，用嚟支助錢去發展核武。聯合國 2019 年出嘅一份報告都話，估計北韓至少透過黑客活動偷走20億美元嘅加密貨幣，遠超聯合國安全理事會最近估算嘅 6.7 億美元，情況都令人關注。
雖然北韓政府例牌否認，但佢哋一邊否認，一邊就邀請外國專家出席於平壤舉行嘅區塊鏈峰會，睇個款係要學多啲關於區塊鏈嘅新技術，睇下仲有乜方法搵多啲加密貨幣返嚟！
相關文章：【企硬！唔take嘢】同一漏洞 Telegram改WhatsApp話唔包
