【勒索新趨勢】唔俾錢 被竊資料網上大公開
勒索軟件（Ransomware）有幾猖獗，相信好多人都知，例如全球最大外幣兌換公司 Travelex，就不幸成為 2019 年最後一間受害機構，喺除夕當日中招，被開發 Sodinokibi 嘅黑客組織勒索 300 萬美元（現已增加至 600 萬美元）。最重要係，黑客組織講到明唔俾錢就會公開由 Travelex 偷返嚟嘅客戶私隱資料，唔再係鎖死晒啲檔案就算。為咗增加可信性，黑客組織已率先將另一受害機構 Artech Information Systems 嘅 337MB 檔案，喺俄羅斯討論區公開「些牙」⋯⋯
勒索軟件最令人頭痛嘅地方，係佢會鎖死電腦入面嘅檔案，仲會透過內部網絡感染其他儲存設備，不過以往嘅勒索軟件只會鎖死檔案，如果受害者平時有做好備份，最多重新還原資料，損失有限。不過，開發 Sodinokibi 嘅組織唔單只鎖死檔案，仲會偷埋資料，要脅受害者唔俾錢就公開私隱，受害者除咗損失重要數據，仲要面臨商譽受損嘅局面，好似美國少數族裔 IT 人力資源公司 Artech，就因為無俾錢而被黑客組織公開部分資料。
不過，Travelex 嘅情況就有啲唔同，因為發言人話經檢查後，發現只係部分檔案被鎖死，並無迹象顯示有數據外傳，所以堅持唔會跪低。黑客組織就堅持話偷咗對方 5GB 數據，包括客戶嘅姓名、出生日期及信用卡資料，仲回應傳媒查詢話 Travelex 暗中同佢哋講緊價，至於點解就自己諗。而喺呢段時間入面，黑客組織就將 Artech 嘅檔案放上網，究竟係「無料扮四條」抑或真係有 Travelex 嘅把柄喺手？就要留意後續發展喇。
今次事件其實相當有啟發性，因為唔少受害公司都傾向隱瞞外洩事件保住商譽，但如果一開始就否認事件，為咗掩飾謊言，唯有繼續講另一個大話，同時間亦增加咗黑客組織嘅籌碼，繼續推高贖金，所以真係中咗招，絕對應該公開事件，即使會受到追討賠償或承擔法律責任，都好過繼續成為「提款機」。另外，再重申一次，中咗勒索軟件，記得第一時間要做嘅嘢係「斷線」，防止病毒擴散出去，仲要保持電腦喺開機或休眠狀態，等專家之後查清楚出事原因同影響範圍，唔好隨便熄機或 reboot，隨時會阻礙事後修復㗎！
相關文章：【神助攻】三成勒索軟件受害人 中招後親手加大破壞力
