【頭號通緝犯】美國懸紅500萬美元捉拿俄國黑客
一講起美國頭號通緝犯，大家都會以為係拉登呢類恐怖分子……我估直到上個月都可能係，但由今個月開始就有變喇！
事關美國司法部十二月初出咗個新嘅通緝令，通緝俄羅斯一個叫 Maksim V. Yakubets 嘅人，懸紅高達 500 萬美元，500 萬美元算唔算多，我唔敢講，但係今年司法部喺拉登死後通緝佢個仔，都只係出 100 萬美元啫，咁呢位 Yakubets 先生睇嚟份量都有返咁上下！
佢到底做過乜嘢事，要搞到美國政府咁高調通緝呢？原來Yakubets早年成立咗一個叫 Evil Corp 嘅組織，一聽個名就知唔係好嘢，呢個組織由2011年開始，用自家研發軟件Bugat（又叫做 Dridex 同埋 Cridex）入侵目標電腦，取得對方嘅個人資料同埋密碼後，成功盜取佢嘅銀行存款，咁多年嚟大大話話偷咗過億美金（其中7000萬美金嚟自美國），但最令人頭痛嘅唔只係佢哋偷咗幾多錢，而係美國司法當局同 FBI 先後喺 2016 年唔同時間，出手打擊過佢哋，甚至成功將佢哋旗下嘅 botnet 網絡消滅，但係都無阻佢哋繼續生存，因為 Bugat 係會不停改良同埋演變，而每次都變得更加複雜同埋難追查，所以先至有咁大嘅威脅性。
其實早喺2009年，英美兩個國家嘅調查局已經留意網名叫做 aqua 嘅 Yakubets，當時佢涉嫌同另一個叫做 Zeus 嘅木馬程式有關，而 Zeus 嘅運作模式同 Bugat 有啲類似，可以話係 Bugat 嘅前身，只係冇諗過會愈搞愈大，變成今時今日嘅規模。熱愛跑車嘅 Yakubets 近年亦相當高調，佢部林寶堅尼跑車車牌，就直情係用俄文「小偷」兩個字做車牌號碼，擺到明未驚過，美國司法部仲話佢 2017 年已經加入咗俄羅斯聯邦安全局（FSB），幫國家做嘢，用 Bugat 軟件入侵其他國家嘅機構偷取機密文件，呢個亦係要咁高調通緝佢嘅原因。
你可能會懷疑，有成個聯邦安全局照住，邊有可能拉到 Yakubets 丫！你咁諗就大錯特錯，以另一位俄羅斯黑客 Roman Seleznev 為例，佢 2016 年就喺馬爾代夫被捕，仲被判入獄 27 年。咁用 500 萬美金去緝拿網絡罪犯，重賞之下必有勇夫，除非 Yakubets 成世匿喺俄羅斯，否則總有落網嘅機會。
