【北韓出手】買現成病毒程式搞搞震
做得黑客，好多時候都係為錢，整咗個勁嘢，當然唔會收埋自己用咁簡單，最好就係公諸同好，放上網公開發售，乘機收返少少開發成本，呢個市場長做長有，質素高功效好嘅病毒程式，仲長期大賣添！
寫得好，仲會吸引到國家級黑客！最近資安機構 SentinelOne 就出咗份報告，話發現北韓國營黑客集團 Lazarus Group，居然走去買 TrickBot 返去用。
嗱，其實我係無貶意嘅，TrickBot 話晒都係全球三大 botnets 病毒程式之一，實力有返咁上下，只係斷估唔到北韓會吼中佢，事關以佢哋嘅實力，實在唔需要外求，自家研發能力都有返咁上下，點解要買個現成程式返嚟呢？
報告就話件事唔係咁簡單，一來用 TrickBot 入侵，冇咁易估到係國家級黑客做，最多當係商業行為，容易掩人耳目，二來喺 TrickBot 下面可以加好多組件，今次北韓班黑客就加咗 Anchor，呢個組件出名用嚟搞銷售系統，而今年年初美國財務部就話發現至少有三個北韓黑客組織，入侵銀行系統嚟抬錢返國家，資助國家添置武器，唔排除今次 Lazarus Group 有同樣目的。
其實今次唔係單一事件，今年美國已經發現 GameOver Zeus 同埋 Dridex 呢兩個病毒程式，同俄羅斯國家黑客有連繫，呢個趨勢發展落去，私營同埋國營黑客條界線只會愈嚟愈模糊，日後兩者一齊夾份做世界都唔奇，歐美國家真係有排煩！
