【FBI警告】俄製手機程式要小心
安裝手機app，基本上你只係會諗個 app 好唔好用，好唔好玩，好少會考慮個app嚟自邊個國家，不過最近美國聯邦調查局（FBI）就發出警告，話安裝俄羅斯製嘅手機 app 要高度小心！
事緣今年年初有隻手機 app 爆紅，佢個名叫 FaceApp，用程式 selfie 完，佢就會用人工智能幫你「換樣」，令你可以見到變老咗嘅自己，或者見到另一個性別嘅自己，由於實在太好玩，所以引起咗一股熱潮，#FaceAppChallenge 成為熱門 hashtag，據報隻 app 總共處理過全球 1.5 億個樣，可見佢有幾咁受歡迎！
但係今年 7 月，有網絡安全專家發現隻 app 原來唔只會處理張自拍相，佢仲可以獲取用家手機入面其他嘅相片，而且可以操控手機嘅搜索同埋 iPhone 嘅 Siri 功能，靜靜雞喺手機背景運作。美國參議院民主黨領袖 Chuck Schumer 當時就即刻去信 FBI，促請佢哋調查 FaceApp 有冇問題。
近日 FBI 終於完成調查，警告話隻 app 有潛在風險，事關根據俄羅斯法例，情報機關毋須向互聯網服務供應商申請，就可以暗中存取國內所有通訊同埋伺服器內容，換言之你影咗嘅相，又或 FaceApp 暗中採集嘅內容，都有可能俾俄期羅政府暗中儲存，因此下載及使用所有俄製手機程式都要特別小心。
雖然 FaceApp 創辦人 Yaroslav Goncharov 即時作出澄清，話所有經 FaceApp 拍下嘅相片，都係上載到美國、新加坡、愛爾蘭及澳洲嘅數據中心，而唔會傳返去俄羅斯伺服器，而且 48 小時內會刪除，但係純粹為咗一個好玩嘅 app 而冒咁大風險，Chuck Schumer 就建議大家唔好搏，以後都唔好立亂裝呢啲表面好玩，實則暗藏私隱漏洞嘅 app 喇！
