【秒速完成】虛報資料申請.gov網站話咁易
如果你收到一封電郵，抬頭係嚟自 xxx.gov 嘅，我諗你多數會傾向相信封電郵係嚟自政府部門，可惜呢個世界真真假假好難分，有人最近就試過，原來要申請 .gov，唔係想像中咁難。
有研究人員最近就做咗個實驗，試下一個普通人，到底申唔申請到 .gov 域名。佢先上網填咗份官方申請表，份表要求佢填行政、資訊科技同埋會計部嘅負責人資料，於是研究人員就用假嘅 Gmail 戶口同埋 Google Voice 號碼蒙混過去，跟住仲要求佢用部門信紙嚟打印張表格，佢又走上網是但搵咗個羅德島小鎮Exeter嘅政府信，剪貼個信紙抬頭嚟用，仲冒充埋自己係小鎮嘅市長，結果成功過關，幾日後就開通咗個 .gov 域名，易過借火！
研究人員話，其實成個申請過程，除咗市長個名係真嘅，其他全部造假。起初佢諗至少域名審查部門點都會打個電話 check 一 check，佢填嘅幾位負責人係唔係真有其人，點知結果係連電話都冇收過。由於研究人員喺美國境內做呢個測試，係觸犯咗美國法例，所以佢一直都冇開名，只係將有關資料俾咗網絡安全網站 KrebsOnSecurity，等佢公開俾大家知，但研究人員就好擔心，如果有國家級黑客知道呢個方法，喺境外做呢件事，可以話係完全零成本，到時佢哋申請埋一堆域名，就可以為所欲為，甚至有機會擾亂埋下年大選結果。
就呢件事，KrebsOnSecurity 有搵過國家安全部，四日後先有人致電 Exeter 嘅市長辦公室了解事情，國家安全部亦有回信俾 KrebsOnSecurity，話會努力關注。前紐約 Trumansburg 市市長兼《The Internet for Dummies》一書作者 John Levine 就話，其實佢做市長嗰三年，一直都同政府部門有緊密接觸，佢哋甚至清楚知道要求證任何關於市內嘅事，係要搵邊一位，有晒名單同聯絡方法，所以 John Levine 話要防止人亂咁註冊 .gov 域名，當局唔會做唔到，只係要用好多人手去做複檢，但如果有咁大個保安漏洞，睇怕就算要動用幾多資源，都要堵塞呢個漏洞啦！
