【條命喺你手】32768先天魔咒 HP SSD失救必死

如果真係有保養期，我希望係 10000 年！不過保養期咁長又有乜嘢用呢，對一啲 set 咗死期嘅儲存設備嚟講，如果無做好 backup，而佢又突然死咗，真係你賠返隻新嘅 harddisk 嚟都無用㗎！

啲人成日話手機、電視用用吓就會突然壞，都唔知係咪生產商預先校咗時間掣，一夠鐘就壞囉。不過，呢啲諗法都係諗吓嘅啫，點估到真係會咁做先得㗎？但最近 Hewlett Packard Enterprise（HPE）就公布，旗下產品採用嘅 SAS（Serial Attached SCSI）SSD 存在韌體缺陷，只要運作咗 32768 小時，就會自動歸西。32768 小時即係幾耐呢？好似都有好長時間喎，係咪正常都會壞㗎？實際上其實只係 3 年 270 日 8 小時，話長唔長話短唔短，但其實 SSD 嘅壽命同寫入量有關，之前 TechReport 網站就試過用幾隻 SSD 嚟測試，就算每日大規模寫入 100GB，連續用5年都仲頂得住。

不過，由於今次呢個係韌體缺陷，所以一旦夠鐘，無論你寫入過幾少嘢都好，隻 SSD 都注定要死，唔會救得返入面嘅內容。喺 Reddit 就有用家哭訴，試過同一個伺服器內，就有 8 隻 SSD 喺 15 分鐘內全部陣亡，相信係啟用時間相近有關！起初 HPE 收到事故報告後都唔知乜事，但後來其中一個 SSD 生產商同佢哋講咗，先發現原來有呢個缺陷。

喺邊度跌低，就喺邊度企返起身，HPE 喺上星期開始提供韌體更新俾受影響用家，安裝後就唔會發生時辰到嘅情況。受影響嘅 SAS SSD 包括 HPE ProLiant、Synergy、Apollo、JBOD D3xxx、D6xxx、D8xxx、MSA 同埋 StoreVirtual 3200 系列產品，大家最好快啲檢查一下裝咗最新版本未。