【病毒速遞】外來裝置隨意插 攻陷紐約警方指紋系統
網絡安全公司同審計公司，喺幫客戶做風險評估嗰陣，都有需要做滲透測試，睇吓員工嘅安全意識夠唔夠高，有無員工要做出嚟重點培訓。由於要試員工嘅安全意識，所以負責測試嘅人有時會特登做啲踩界嘢，例如扮維修員要求插 USB 手指入公司內部電腦系統，又或借用電腦收發電郵，如果員工覺得唔對路，就會拒絕要求或暗中報告上級跟進。不過，唔少調查報告都會話俾大家知，員工本身就係最大嘅安全漏洞，所以未必會意識到咁做可以好大件事，包括紐約警察學校嘅員工在內。
話說上年 10 月，紐約市皇后區一間警察學校因為要裝一個數碼顯示屏，於是就搵咗外判商嚟搞。唔知係咪學校入面嘅人無諗過件事咁嚴重，當外判商要接入內部聯絡做設定時，竟然無人出手阻止對方直接將電腦接駁，結果呢部中咗毒嘅電腦，就透過網絡將病毒感染 23 部指紋追蹤系統。紐約警方喺幾個鐘後就發現有可能出現私隱外洩，即時漏夜熄咗 LiveScan 呢個指紋追蹤系統，同時將受影響嘅 200 部電腦重新安裝，避免病毒透過網絡擴散，最終都成功控制到病毒嘅影響。
外判商喺呢次事件，梗係要負大部分責任，不過，紐約警方經調查後，相信對方都係無心之失，所以未有公布對方嘅公司名及控告對方。據講呢個 LiveScan 系統連接住藏有 700 萬筆資料嘅數據庫，當中更包括較早前被證實非法保存嘅未成年罪犯嘅資料。至於有幾多人受影響？ 發言人就回應話受影響嘅只得 0.1%，信唔信就由你決定喇。不過，外來 USB 儲存裝置真係唔好亂咁俾人生拮，一旦中咗病毒，真係易請難送㗎！
