【又出事】iOS用家注意 Facebook暗中偷開相機
Facebook 又喺私隱問題上出事喇，有用家喺 Twitter 上話，發覺自己睇睇下 Facebook Watch 影片時，Facebook 竟然偷偷地用咗手機嘅相機功能，點解嘅點解嘅？
發現呢個問題嘅係 iPhone 用家 Joshua Maddux，佢喺 twitter 上拍片話當自己用手機睇緊 Facebook 影片，由橫持轉直持嘅觀賞模式過程中，發現 Facebook 竟然自動打開咗 Story 拍攝模式。Maddux 第一時間反應係懷疑其實 Facebook 係咪一直喺背景模式偷開相機？自己有無成為偷窺對象？
當呢個問題被放上網，即時被大家瘋傳，因為 Facebook 處理用家嘅私隱問題已經唔係第一次出事，所以用家都好關心今次又打算收集用家啲乜嘢個人私隱？有好多用家即時嘗試自己部 iPhone 有無呢個問題出現，但實際上又唔係個個成功複製得到，於是 Joshua 又另外借咗幾部唔同型號嘅 iPhone，發現問題原來只存在喺 iOS 13.2.2 之上，iOS 12 就無呢個問題。而小編當然即刻拎手上其中一部未更新嘅 iPhone 出嚟試試，發現喺 13.1.2 版本上都 work。
對於呢個熱門話題，Guardian Firewall 總裁就覺得令人驚訝，暗示 Facebook 居然會犯咁大嘅錯誤。Facebook 副總裁 Guy Rosen 亦喺 twitter 上話睇落都似係一個 Bug。咁到底發生緊乜事呢？經調查後，Facebook 發言人指出呢個純粹係一個 Bug，喺 Facebook 版本 244 上，當 iOS 用家由橫持模式轉為直持時，Facebook 會自動打開相機，俾用家即刻拍片上傳，而其他時間 Facebook 係唔會取用相機。
雖然 Facebook 咁回應，但唔知大家信唔信呢？不過，上星期 Facebook 為 iOS 推出嘅版本 246，就已經解決咗呢個問題；至於其他未想更新嘅用家，亦可以係「設定」內進入 Facebook 選單，取消相機同咪高風權限，一樣都可以終止呢個問題。不過如果下次想喺 Facebook 內直接㩒相機 icon 影相，又要走入嚟開返先得。
