【國家級任務】格魯吉亞遭大規模網絡攻擊 總統網站都出事
以前打仗，係比併兩國軍事實力，弱國唔夠強國打就唯有認低威。但時移世易，而家已經好少國家會真係出軍隊打仗咁勞民傷財，就算出軍都有一半係擺姿態而唔係真打，原因好簡單，真係要搞另一個國家，用網絡戰就得啦，唔使用刀嘅！
最近東歐國家格魯吉亞就成為被害目標，早幾日（10月28日）被黑客大規模入侵，癱瘓咗成15000個網站，當中包括法院、新聞媒體嘅網站，最得人驚係連總統網站都中招，全部網站都換上前總統 Mikheil Saakashvili 張相，仲有句「I’ll be back!」嘅標語，兩間當地電視台 Imedi TV 同埋 Maestro 亦被短暫中斷廣播。唯一好消息，就係當地比較緊要嘅網絡基建並冇損毁，互聯網供應商 Proservice 第二日發聲明，話好努力咁修復緊有關問題，但用咗一日時間都只係修復咗一半網站，話要用多日先可以回復正常。
其實呢次已經唔係格魯吉亞第一次俾人搞，2008年佢哋同俄羅斯關係好緊張，甚至發生過軍事衝突，當時格魯吉亞政府已經指控過對方，話佢哋搵人癱瘓大部分銀行同埋政府網站，俄羅斯當然例牌否認，但係今次手法同上次好似，所以唔排除又係俄羅斯搞鬼。 BBC 記者 Rayhan Demytrie 引述網絡安全專家話，格魯吉亞嘅網絡設防好似中門大開咁，睇嚟唔搞搞佢真係隨時都再出事。
不過呢單嘢亦令人好擔心，Surrey 大學網絡安全專家 Alan Woodward 教授就話，從攻擊性質同埋規模嚟睇，好難令人相信呢個唔係由國家策動；而 Synopsys 高級保安專家 Jonathan Knudsen 就話，呢類攻擊咁大型咁有組織性，幾乎可以肯定係國家級別，用攻擊嚟宣示佢哋嘅地緣政治立場。嚟緊英國有機會提早喺12月大選，到時攻擊會唔會由東歐轉去西歐呢？就要拭目以待喇！
