【玩還玩】專家教路 安全打機小貼士
好多人都會用打機嚟減壓或 kill time，雖然只係娛樂嚟，但大家都唔好忽視佢嘅安全性。Cyware 網絡安全分析師就近發表一篇文章就指出，無論係玩家抑或遊戲開發商，都要改變一下大家嘅想法，否則好易造成個人私隱外洩，後果可以好嚴重咁話。
其實大家間唔中都會聽到玩家帳戶被搶嘅消息，除咗因為廠方管理玩家嘅私隱不善導致外洩，例如上個月手機遊戲開發商 Zynga就洩露咗兩億玩家帳戶資料，另外亦可能同玩家設定嘅密碼太過簡單有關。專家 Ryan Stewart 解釋，唔少玩家覺得打機只係娛樂，認為無乜特別風險，為咗快速登入帳戶，所以傾向選擇簡單嘅密碼組合，就算廠方提供雙重認證登入方法，都唔會特別選用。Ryan 亦指出加上大部分玩家都係青少年，佢哋亦唔認為個人私隱有幾重要，所以對守護帳戶疏於防範。
Ryan 話如提升打機嘅安全性，無論玩家或開發商都要有所提升。首先係玩家方面，其實資深玩家嘅帳戶係地下市場有市有價，而且有時帳戶入面仲會有玩家嘅信用卡資料，所以絕對會成為黑客攻擊嘅目標，所以玩家一定要設定複雜嘅密碼，同時唔好同其他帳戶共用密碼，絕對唔好貪方便直接用Facebook 或 Google 帳戶嚟登入，萬一私隱外洩就有可能令呢啲帳戶同時失守。如果打機嘅裝置有防毒軟件，玩家亦應該考慮安裝。
至於遊戲開發商方面，Ryan 話應該主動提醒玩家安全事項同提供實際做法俾玩家參考，自己亦要做好防禦工作，以免將玩家資料外洩。仲有一點較為特別，就係開發商應引入行為分析工具，當發現玩家嘅行為出現異常，例如短時間內登入位置過遠、登入時間大幅度改變，都有可能係帳戶被黑客攻擊嘅徵兆，咁就可以為玩家提供多一重保障。簡單哋講句，即係玩都要玩得專業啦。
