【外賣唔係咁嗌㗎】帳戶共用密碼 被盜用嗌到爆額
自從有咗外賣 app，食嘢真係多咗好多選擇，幾個同事夾份叫，講真運費又唔係多，但就可以跨區食好西，就算喺馬鞍山、青衣、小西灣呢啲美食沙漠返工，開飯都唔使做阿愁。不過，最近外國嘅外賣 app 就接連出事，除咗 DoorDash 一氣過洩咗 490 萬用戶資料，另一隻叫 Chipotle 嘅外賣 app，近日亦有用家投訴帳戶被瘋狂盜用。
美國用家 Jessica Gallenstein 最近喺俄亥俄州 Glenway Avenus 用 Chipotle 嗌咗個外賣俾自己，點知隔日就收到銀行通知，話佢張簽帳卡已經碌爆額。Jessica 當然嚇咗一跳，於是即刻 Login 檢查究竟係乜嘢交易，跟住就俾佢發現咗原來啲交易全部來自 Chipotle，雖然每次交易嘅金額只係由 10 美元至 40 美元，但由於係一連串嘅非法簽帳，所以好快就使晒簽帳卡內嘅錢。除咗 Jessica 之外，其他「被請人食飯」嘅用家仲有幾十位，佢哋都喺 Reddit 上投訴。
跨平台密碼一洩大件事
翻查紀錄，原來 Chipotle 喺 2017 年曾經發生私隱外洩，不過，又解釋唔到點解 Jessica 等用家嘅帳戶會相隔兩年先俾人盜用，因為如果用家修改咗登入密碼，呢啲外洩嘅帳戶密碼就變成廢物，所以黑客通常會盡快喺短時間內瘋狂購物，就好似 Jessica 嘅簽帳卡一樣。Chipotle 方面之後喺回應傳媒查詢時就話，好可能 Jessica 嘅個案，係因為佢喺唔同平台用咗同一組登入帳戶名稱同密碼，當其他網站發生私隱外洩，一定會有唔少黑客拎呢啲登入組合去其他網站測試，所以今次事件未必關佢哋事咁話。
雖然暫時都證事唔到事件原因，但 Chipotle 嘅回應的而且確帶出一個重要嘅問題，就係大家為咗貪方便，喺登記唔同帳戶服務時，都會用同一個組合，所以只要其中一個外洩，就好易連其他帳戶都失守。不過，如果每個帳戶都要用唔同密碼，又真係好難記嘅，所以大家可以利用一啲安全嘅密碼管理 app，例如 Firefox 嘅 Lockwise，以及 Sticky Password 等等，只要輸入一次，日後就算唔記得都好易搵得返，唔使下下都㩒「忘記密碼」啦。
