【一念地獄】 澳洲試行人臉辨識 學者評價「完全失敗」
其實人臉識別技術仍未成熟，但世界各地執法機關已經一致看好，中國就係其中一個？究竟人臉識別技術會令世界更加美好，抑或變得縛手縛腳？背後有何隱憂？最近科技網站 ZDNet 發表咗一篇關於澳洲政府看待人臉識別嘅文章，睇下有乜嘢啟示同借鑑？
反恐為由，硬推人臉識別
唔少政權都喜歡以「反恐」為由去提升國防、安檢權限同技術。昆士蘭州警察局（QPS）於去年黃金海岸嘅英聯邦運動會（Gold Coast Commonwealth Games）推出人臉識別系統，作為防範恐怖襲擊之用。點知轉個頭，已經被警方用來進行一般警務調查；雖然被權限所約束，只能接觸有限資料，但已夠引起大眾關注及不安。
如果話套架生未發展成熟，又未諗到全個配套，貿然上馬絕對不智。昆士蘭大學資訊科技及電機工程學系 Brian Lovell 直斥當局呢個決定 complete failure，徹底失敗。Brian Lovell 指，昆士蘭州警察局完全無喺 deployment 下工夫，完全無認真咁為鏡頭擺位、部署考慮過，而且背後亦無做好基建 support，反而會製造出私隱危機。Brian Lovell 慨嘆話人臉識別係可以做得好，但大部分人以為 cheap cheap 哋就搞得掂。」昆士蘭州警察局發言人就話，會持續檢討及改善，即係話：未完美，但可接受，可改善。
Big Brother is watching you
澳洲民眾嘅疑慮，其實同我哋一樣：喬治‧歐威爾嘅《1984》即將成真，監控、私隱係最大問題。呢套系統有冇檢討過相關政策、法律條文？邊啲人有權接觸呢套系統、技術？邊啲人可以使用、收集呢啲資料？澳洲非牟利組織 Electronics Frontiers Australia （EFA）嘅 CEO Lindsey Jackson 更警告，人臉識別技術仍在實驗，構思中嘅效果無疑極之吸引，但係未諗清楚、未有充份討論就用，就有問題，尤其威脅到少數族裔及弱勢群體。矛頭所指，顯而易見。
唔好以個人私隱去換取服務
Lindsey Jackson 指澳洲人民嘅私隱保護並非基本人權，而且，監控技術發展對人民嘅影響越來越明顯。最重要係澳洲嚴重缺乏針對人權和公民自由嘅監督機制和全面執法，因此，大眾對人臉識別、監控、提供更多個人資訊予政府等統統持審慎態度。Lily Ryan 強調，人民應該有掌控私隱嘅權利，唔好以個人私隱去換取政府服務呀。
Amazon Rekognition 備受關注
除咗澳洲、中國，其他地區嘅人臉識別應用亦備受關注。Amazon 嘅即時人臉識別技術 Rekognition 測試，已被美國多個省份叫停，一封寫畀 Amazon CEO Jeff Bezos 嘅公開信中清楚表明，人民應該可以自由地响街上行走，免於政府監視，人臉識別正正威脅人民嘅自由。Amazon 員工亦發聲，要求公司唔好將技術賣畀警察。當然，人臉識別技術嘅研究同應用絕對唔會壽終正寢，起碼响非監控或商業世界，仍然打得火熱。而澳洲政府仍然繼續其身份配對服務法案（Identity-matching Services Bill ），若果通過，民政事務部將有權合法運營人臉識別系統，收集、使用及披露可識別信息，並與中央系統進行身份配對。
亦有人撐人臉識別
當然，人臉識別是否一面倒地邪惡？澳洲高科公司 NEC 當然力撐人臉識別技術，強調現今嘅加密、保安、去身份化技術已經足夠保障大眾私隱，亦強調不會濫收過多生物識別資訊。又指出善用科技絕對可以方便人民生活，例如過關更快更方便；甚至可以減少罪案，令社會更安全。更指出，現時人民未見到人臉識別技術帶來嘅好處，當大家從中得到個人方便或者獲利，就自然會接受人臉識別及大眾監控。
一步都唔會退
EFA 嘅 CEO Lindsey Jackson 表示，一日未有正式嘅人臉識別政策框架去管制，政府及私營企業總會有機會利用該技術去搵着數，更甚者係用來作惡。所以，未有足夠保障政策，澳洲人民就唔會畀佢繼續發展，一步都唔會退。環顧世界各地面對嘅情況，的確非常類近，科技發展固然重要，但都要顧及公眾利益、普世價值，I.T.人，加油！
