【講你又信】明話俾贖金 暗中修復系統斷黑客財路
再講多次，對付勒索軟件，除咗要安裝防毒軟件，做好 endpoint protection，備份真係好重要！一旦有事，都唔需要下下俾贖金！
近呢一兩年，美國超過 40 個州縣嘅政府部分先後成為勒索軟件（Ransomware）嘅苦主，德州更佔咗大多數。唔好以為多中住嘅地方損失會最慘重，好似佛羅里達州嘅 Lake City，雖然只得 1.2 萬人口，但由於系統無備份，為咗解鎖攞返啲資料，唯有將 46 萬美元贖款轉入黑客戶口，認真無奈。
最新受害者係 Massachusetts 州嘅 New Bedford 市政府，佢哋喺 7 月 4 日受到勒索軟件攻擊，鎖死咗百幾部電腦。好在當日係美國國慶日，公務員都唔使返工，所以有好多部電腦無開，大大減低攻擊嘅破壞力。不過，始終都有百幾部電腦中招，市長 John Mitchell 喺一番掙扎下，終於決定同黑客接觸傾贖金。Mitchell 話網絡安全專家都唔會建議佢哋俾贖金，而佢本身亦無打算俾，只係因為想延長黑客刪除檔案嘅期限，所以先同黑客聯絡講價。黑客起初要求 500 萬美元贖款，Mitchell 當然唔答應，經過幾次返價，佢話最後將贖款金額定係 40 萬美元，因為呢個價錢曾試過有其他中咗招嘅市政府俾過，而且因為市政府買咗網絡安全保險，呢筆贖金亦全數喺保障範圍內，就算真係要俾，都唔使市民夾錢。
好在最終都唔使俾贖金，首先因為中招電腦只屬小數，修復影響唔大，再加上 IT 部門一直都有做備份，所以回復資料亦唔困難。最重要係喺講價期間，IT 部門亦同時提升咗防禦工具，令到市政府嘅系統唔會再受到同類攻擊，所以先可以放心唔俾錢咋。
