【鬼上身】Deepfake即時召喚普京 完美造假仲爭半年

Deepfake 換臉技術嘅專家估計，距離完美造假換臉影片出現嘅時間只得返半年至一年，點解？因為佢睇完內地開發嘅 ZAO app 之後，覺得有修正嘅空間囉。

南加州大學 Computer Science 系副教授 Hao Li 一向係 deepfake 技術嘅專家，最近就為 MIT 科技會議炮製咗示範片段，俾 MIT Technology Review 總編 Gideon Lichfield，喺台上展示即時換臉技術嘅發展去到邊個階段。Lichfield 喺台上一人分飾兩角，一個做番自己，另一個就係俄羅斯總統普京。Lichfield 假扮訪問普京，但輪到「普京」發言，Lichfield 就衝去另一個專用嚟加工 deepfake 嘅位置，然後係銀幕上以唔到一秒嘅時間，等系統將普京嘅樣套上，雖然仲係有啲假，但已反映出 deepfake 嘅即時性，睇到現場觀眾發晒呆。

訓練AI有門路

事後 Hao Li 接受傳媒採訪，問到佢關於 deepfake 技術嘅睇法，呢位先驅者竟然「今日的我打倒昨日的我」，之後佢仲強調要做到完美套臉，至少仲要等多幾年，但今次就話最快可能喺半年至一年之間。Hao 話最近佢留意到一隻由內地企業陌陌開發嘅換臉 app ZAO 之後，就推翻咗之前嘅諗法，佢話相信業界已搵到方法點去訓練 AI 系統，等 AI 可以更準確將人臉換嚟換去，而完全唔會露出任何破綻。

呢句說話一出，即時震驚美國網絡安全人員，因為下年就係總統選舉年，如果完美造假技術咁快出現，到時「假視聞」就會好容易左右選民嘅投票決定。如果好似上屆美國總統大選一樣，受到社交平台操控民意就大件事喇！

資料來源：https://cnet.co/2mnPAPx、https://bit.ly/2m17FD4