【好friend咩？】每日三成來電 都係機械人打嚟！
Robocall，即係自動語音通話，真係諗起都𤷪！有調查顯示，美國境內每日都有兩億個電話係由機械人打出，足足佔總電話量嘅三成。Robocall 已經成功登上聯邦通訊委員會被投訴對象嘅第一名，問你怕未？
發生喺美國嘅 Robocall 目的有好多，包括促銷、政治宣傳、詐騙、騙取用戶資料等。美國 Transaction Network Services（TNS）利用機器學習、大數據分析，幫助用戶及電信業界對抗垃圾來電。日前 TNS 發表咗一份報告，公佈有關美國滋擾電話嘅調查。
喺報告內，TNS 為美國電信業者億億聲嘅電話進行分類：「高危類」指詐騙電話，目標係盜取個人資料或金錢；「滋擾類」係純粹嘅煩，唔包含惡意攻擊。雖然好似冇害，但單係「煩」就夠死。TNS 更發現，「滋擾類」電話嘅增長比其他高危詐騙電話多 38％，即係越來越多，越來越煩。
另外，TNS 指出自動語音電話「騎劫」個案有兩倍升幅，所謂騎劫，即係 illegal spoofing，來電時會顯示假冒嘅電話號碼，繞過垃圾電話過濾器。TNS 指每 1700 部電話之中，就有一部被騎劫，比去年上升咗一倍。估計美國有 2.5％ 嘅手機已經中招。TNS 報告中亦指出，Robocall 嘅目標已經開始轉移到中小型及本地電信業者。
最後，要留意新類型「雪靴」垃圾電話（Snowshoe Spam），即係用一個熟悉、類似受害人號碼嘅詐騙電話，令你更容易放低戒心，好多人因此中招。最近美國參議院同白宮已經就 Robocall 問題立法規管，似乎可以進一步阻止 Robocall 肆虐，加油！
