【企硬！唔take嘢】同一漏洞 Telegram改WhatsApp話唔包
原來發俾 iPhone 用家嘅多媒體訊息係刪除唔到㗎，仲唔係漏洞？Telegram 一收到通知即刻 take action 修補，WhatsApp 就回應話從來無保證過訊息一定可以刪除，所以唔會改……講呢啲？
WhatsApp預設自動下載
講緊嘅係 WhatsApp 入面嘅 Delete for Everyone 功能，佢嘅作用係可以喺大約一個鐘之內，俾發訊人刪除傳送出去嘅訊息同埋相、片，而且可以連群組內所有成員收到嘅嘢都刪除埋，就算 send 錯咗啲有性命危險嘅訊息，都有機會掹得返。不過，原來呢個情況只適用於收訊人係用緊 Android 手機，iPhone 用家如果一直採用 WhatsApp default settings ，Sorry，你係刪唔走發出嘅相同片㗎。
發現呢個 bug 嘅係應用軟件安全顧問 Shitesh Sachan，佢發現喺 default settings 下，無論係 Android 抑或 iOS 系統，當 WhatsApp 收到相或片，係會直接下載入相簿內。雖然動作一樣，但原來只要多媒體檔案一入咗 iOS 嘅 Camera Roll ，WhatsApp 就唔會幫到你 delete，除非收訊人一早閂咗自動「儲存到相機膠卷」功能先得，相反 Android 就無咁嘅情況，無論有無儲存入手機嘅相簿，都一樣可以 delete 得到。
Telegram快速回應
其實呢個 Delete for Everyone 嘅問題，喺 Telegram 上亦一樣存在，但 Telegram 好快已修補漏洞，就算 iPhone 用家收完，發訊人都有能力刪除。不過，WhatsApp 就拒絕即時修補，原因係佢哋無保證過發送嘅訊息或相、片一定可以永久刪除，同時亦指出無論刪唔刪除到，收訊人其實都有可能已經睇咗訊息，又或將檔案另存地方甚至 cap 咗圖，所以刪除意義唔大。如果真係咁諗，其實當初點解要加呢個功能呢？之不過，WhatsApp 最後都補多句話未來可能會修正呢個設定，至於幾時就要等通知喇。
