【私隱第一】加州州長拒引警方入人臉辨識

    根據華盛頓郵報報導,加州州長 Gavin Newsom 將會簽署法案,限制執法人員喺隨身拍攝鏡頭內加入人臉辨識技術,有份動議呢項法案嘅成員話,原本裝備呢啲鏡頭有助改善警民關係,但如果人臉辨識技術會破壞信任關係,令人憂慮會變成監控工具,咁就寧願唔好有呢項功能住,所以法案會強制禁止執法機關喺 2023 年或之前安裝人臉辨識,真係令人拍爛手掌。其實唔好話有無人臉辨識,要市民信得過呢啲鏡頭,除咗儲存影片嘅方法具透明度,唔可以隨便攞嚟用或銷毁之外,仲要小心存放,否則就好易洩露市民私隱。

    好似 Miami 嘅執法機關就唔係好靠得住,早排 Black Alchemy Solutions Group 行政總裁 Jasun Tate 就喺自己個 Twitter 度報料,話網上搵到條公開連結,係人撳入去都可以睇到晒警方隨身鏡頭嘅影片,數量仲有成 1TB 咁多!

    Jasun 點搵到呢條連結呢?原來佢幫個客搞緊單 job,點知上網搵料時,喺一個黑客經常出沒嘅討論區見到呢條 link,開頭以為流料,點知一 click 就發現大件事,所以嚴格嚟講,Jasun 並唔係第一個發現條連結嘅人,而且睇番討論區嘅時間,呢個網站大大話話公開咗幾日添。

    事件俾 Jasun 揚開之後,傳媒當然就努力跟進,追查之下,終於發現所有片段嚟自 Miami 警方嘅外判商,原來外判商「豬隊友」上身,就咁用 MongoDB 呢類最簡單嘅數據庫,將影片以無加密嘅狀態擺晒上網,而喺再進一步調查下發現,其他警局幫襯嘅外判商之中,至少有 5 間喺處理警局資料時,係冇做任何網絡保安措施嘅,成件事真係震驚美國警界!

    雖然好快班外判商已做返補救措施,Jasun 所公開嘅網站而家亦已經登入唔到,但係話晒喺黑客討論區公開咗幾日,都唔知幾多人下載咗,甚至拎埋出街賣都唔知。外判商會唔會俾人告「不誠實使用電腦」罪呢,就要過多一排先知喇!

    資料來源:https://wapo.st/2kHKsWe、https://bit.ly/2mhM9d9

    #Biometric #FacialRecogconition #SurveillanceCamera

    相關文章