【因小失大】PayPal假網站現金回贈 慳幾蚊變輸幾千
雖然由細個開始，阿爸阿媽已經成日教你便宜莫貪，但而家諗返轉頭，咁耐以嚟你因為貪心而中過幾多次伏？肯定唔會少啦，所以用現金回贈或折扣優惠嚟做魚餌嘅手法，先至可以長做長有。
冒牌都要專業
最近網絡安全研究員 nao_sec 就發現，勒索軟件 Nemty 嘅變種最近開始活躍，透過 RIG EK 漏洞利用工具包，喺下載者嘅電腦上安裝惡意軟件，誘導佢哋去到虛假 PayPal 網站，然後再話只要下載及使用專用軟件，每次交易就會回贈返 3 至 5% 金額。研究員嘗試打開下載嘅 cashback.exe 執行檔，結果發現佢會將受害者電腦內嘅檔案上鎖，並要求交出約 7,800 港元贖款作為解鎖費。雖然另一位研究員 Mo169 估計，今次中招嘅人唔多，因為 RIG EK 本身已唔係好多人下載，而且用嚟發動攻擊嘅 Internet Explorer 及 Flash Player 已無乜人用；不過， Nemty 嘅攻擊過程都頗有心思，值得大家參詳一下黑客會點樣發動攻擊。
基本上，偽造嘅 PayPal 網站整到同原裝網站一模一樣，同時間黑客亦利用一種稱為 homograph attack 嘅方法，將瀏覽器會自動轉換唔同字型碼嘅漏洞，令目標人士誤以為去緊自己想去嘅網站，例如 Punycode 碼 「xn--ayal-f6dc.com」轉換成 Unicode 後，就會成為 paypal.com ，進一步令對方跌入陷阱，下載 Nemty 勒索軟件。去到實行部分，Nemty 會偵測受害者嘅電腦位置，如發現屬於俄羅斯、白俄羅斯、哈薩克斯坦、塔吉克斯坦或烏克蘭等國家，就唔會將電腦檔案上鎖，其他國家就一律執行。
研究員話好在 Nemty 都好易俾防毒軟件偵測到，喺 68 種防毒引擎中，就有 36 種有佢嘅病毒特徵記錄。不過講到尾都係得一半咁上下，唔想咁易中招，始終都係要靠自己，便宜莫貪呀。
