【有錯唔改】手機接收SMS漏洞 Sony拒修華為下一代再搞
當網絡安全公司 Check Point 今年三月舉報呢幾間公司嘅手機有漏洞，有兩間好快就推出修補檔，而華為就「計劃」喺下一代手機再修補，Sony 仲勁，直頭回應話已跟足指引毋須改善添，大家買手機識揀啦！
SMS訊息設定手機傳輸
今次 Check Point 安全專家發現嘅漏洞到底係乜嘢嚟？原來係同 OMA CP 訊息有關。OMA CP 即係 Open Mobile Alliance Client Provisioning，係一種俾網絡供應商推送通訊設定嘅單向訊息，等手機可以用嚟發送圖片、電子郵件或傳輸數據，所以每次用新手機接駁網絡供應商，又或有新嘅網絡設定，網絡供應商都有需要發出呢種訊息，一旦黑客可以假扮供應商發出訊息，用家又同意安裝，黑客就可以通過改動手機嘅傳輸設定，將用家嘅電訊、網絡連接引導去惡意伺服器。
安全專家就發現，Samsung、LG、Huawei 同 Sony 嘅手機喺接受 OMA CP 時有漏洞可被利用，因為即使訊息係發自不被信任嘅來源，佢哋都一樣會接收，其中 Samsung 係最差果間，因為就算發送者唔知手機嘅 IMSI 碼都得，接收訊息都濫過人。
經 Check Point 專家舉報後，Samsung 同 LG 都分別喺五月及七月推出修補檔，而 Huawei 同 Sony 喺現階段都未有更新。作為用家，可以點保護自己？專家話最簡單方法係一律唔開 OMA CP 訊息，如果手機上唔到網或收唔到訊息，到時先打上網絡商嘅 CS 叫佢哋發送設定訊息，咁就可以減少被騙風險啦。
