【病歷賤賣】醫療紀錄千六蚊有交易 中國黑客專偷治癌資訊
大量網絡安全統計數字顯示，醫療機構已成為黑客其中一個至愛目標，除咗因為佢哋保存咗好多病人資料，亦因為醫療機構有大量聯網器材，喺設計時根本無乜點諗過會被黑客攻擊，所以有唔少漏洞可以被利用。
而最新一份由網絡安全公司 FireEye 發表嘅調查報告，就指出由上年十月初至今年三月尾，喺地下討論區內刊登咗大量出售病人私隱嘅廣告，呢啲病歷紀錄主要來自美國、英國、加拿大、澳洲同印度，當中更包含病人嘅電郵地址、駕照、醫療保險資料等等，而最平一宗交易涉及約 20 萬病人資料，價錢只由千六蚊港幣起。考慮到黑客可以攞住呢啲資料，之後用嚟向病人發動社交工程、釣魚攻擊，甚至進行勒索嘅話，呢筆費用絕對係價廉物美。記憶猶新，上年新加坡醫療機構 SingHealth 被黑客盜取嘅 150 萬個病歷中，更包括總理李顯龍，當然如果有呢啲名人資料，價錢就唔會咁平啦。
主動調查黑客攻擊目標
除咗售賣病人私隱外，亦有黑客賣埋醫療機構嘅登入資料，等買家可以自由出入醫療網絡、喺系統植入木馬，甚至橫向發展，感染其他醫療機構嘅系統。而根據 FireEye 嘅報告，嚟自中國嘅 APT 黑客團體，對醫療機構最有興趣嘅係同癌症研究相關嘅研究報告。FireEye 專家話喺今年四月初，多個中國黑客團體嘗試向美國一間醫療中心發動攻擊，偷偷潛入系統去挖掘癌症醫療報告。FireEye 專家指出佢哋喺隔離系統內放置嘅各類誘餌文件中，全部黑客團體都嘗試盜取一份癌症會議文件，專家解釋話相信係中國醫療企業想了解美國治癌嘅最新發展，希望可以搶先喺市場上推出新藥物。
喺報告嘅最後，專家指出醫療體系絕對有必要建立更強及統一嘅網絡安全標準，因為隨著而家愈嚟愈多醫療器材具備上網功能，黑客可以隨意修改一啲醫療設備嘅參數，令病人服用過量或不足的藥物，致病人於死地；亦可以偽造各類檢查報告嘅結果，例如電腦掃描、磁力共振、血液化驗等等，同樣可以令有病變無病，無病變有病添！
