【FB用戶福音】全新功能 Off-Facebook Activity 助你私隱自決

    Facebook 近年飽受私隱問題困擾,CEO Mark Zuckerberg 上年承諾協助用戶「Clear History」,今日終於找數,推出 Off-Facebook Activity 功能,讓用戶掌控自己嘅私隱,清除 Facebook 存於第三方網頁及 Apps 嘅資料,截停追蹤。

    自從「劍橋分析(Cambridge Analytica)」事件,Facebook 積極改革,大動作包括拒絕有問題嘅應用程式、打擊有問題專頁。日前更推出全新功能 Off-Facebook Activity,旨在讓用戶私隱自決,官網宣稱 Off-Facebook Activity 讓用戶可以獲得所有於 FB 活動嘅資料摘要,更容許用戶將資料從帳號中刪除。Facebook 稱此舉雖然會影響公司收入,但認為用戶能夠掌控自己嘅資料更加重要。

    Facebook 點樣收集用戶資料?

    Facebook 一直以兩種方法收集用戶數據:用戶於網頁及應用程式輸入嘅資料,以及追蹤用戶嘅瀏覽活動,如撳Like、留言、以及用戶瀏覽外間網頁嘅痕跡 Facebook Pixel。廣告商可利用收集嘅數據,向特定用戶推送廣告及內容,所以當你睇完沖繩旅遊資料,轉頭 Facebook 就會向你賣沖繩旅遊相關廣告喇。

    如何啟動 Off-Facebook Activity?

    而 Off-Facebook Activity 功能,就可以畀用戶查看自己俾 Facebook 收集咗嘅資料,用戶只須於帳戶設定之中開啟 Off-Facebook Activity 功能,就可以檢查被追蹤嘅網頁、應用程式以及相關資料。同時,用戶可以選擇 Clear History,刪除瀏覽紀錄,以及截停(disconnect)所選嘅網頁及應用程式於日後嘅追蹤。Facebook 強調唔會知道用戶嘅瀏覽紀錄內容,亦唔會於 Facebook、Instagram 或  Messenger 使用當中資料。

    注意!其實係「截停」,唔係「刪除」

    要注意嘅係,當你「截停(disconnect)」追蹤,並不表示 Facebook 刪除咗你嘅瀏覽資料,佢只不過唔畀第三方收集你嘅瀏覽資料。因為 Facebook 一向做法,係於背景之中為每個瀏覽活動建立一個獨立嘅 SID,然後將 SID 對應用戶嘅 UID,從而獲得每個用戶嘅瀏覽資料。而 「截停(disconnect)」就只係移除 SID 與 UID 之間 mapping,並冇真係刪除資料。簡單嚟講,即係 Facebook 仍然擁有收集到嘅資料,只不過冇將 SID 與 UID 配對。

    暫時 Off-Facebook Activity 功能會先响愛爾蘭、西班牙及南韓開通,其後幾個月,會逐步於全球開通,大家要留意。

    資料來源:https://bit.ly/2P7BmQI、https://bit.ly/2ZasNo8、https://bit.ly/2Pi7zFo

    #Advertising #Facebook #Off_Facebook_Activity #Tracking #UID

    相關文章