【越南版Facebook】政府扶植本土社交平台 兩年吸過半越南人用
![Topic report3](https://www.wepro180.com/wp-content/uploads/2021/08/ccb15b78-web_viet-750x430-1.jpg)
Facebook、Twitter 上嘅假消息問題嚴重,兩間公司尋日一齊發聲明話刪除咗大量針對香港示威活動嘅假消息及假帳戶。其實唔單只佢哋,網上嘅假新聞都係無日無之,所以唔少國家都意識到單係靠呢啲外國機構嚟審查係絕對唔夠;另外如果太多國民依賴外國社交平台,亦難以達到控制言論嘅目的。
越南政府信息部部長阮猛雄(Nguyen Manh Hung)早前喺一個會議上,就向胡志明市嘅 IT 界業內人士表明,政府希望越南可以擁有自家嘅社交平台,同時亦表明政府會為本地企業提供平台去測試新技術及網絡安全環境,唔使再靠 Facebook 等社交平台,同時亦可以幫國民過濾假消息。雖然外界對越南政府呢個願景有好多懷疑,例如係咪想拑制言論等等,不過,國內就已經有唔少地道嘅社交平台出嚟,而且佢哋嘅「野心」都唔細。
Hahalolo
呢個係一間以胡志明市為基地嘅旅遊資訊社交平台,今年 6 月先開業,但目標就係喺 2024 年吸引到 20 億用家使用。
Gapo
新鮮滾熱辣喺七月先開業嘅社交平台,提供聊天及貼文功能,CEO 話好有信心喺 2021 年攞到 5000 萬用家註冊。
俾個概念大家先,現時越南人口約超過 9000 萬,所以要喺咁短時間內做到上述嘅成績,真係令人懷疑係咪進取得滯,將計劃放上集資平台,都唔知有無人落疊。而翻查資料顯示,原來越南政府自從 2007 年起已發出超過 300 個營運社交平台嘅牌照,不過由於呢啲平台嘅介面難用,功能又贏唔過 Facebook,所以估計就算政府大力推動,都未必可以令越南國民轉台。
另一方面,越南政府之所以咁積極,相信係同今年一月新成立嘅網絡安全法有關,新法例下外資企業要喺越南提供網絡服務,必須喺越南開設公司或代理,喺境內儲存越南國民嘅個人私隱;同時確保發佈嘅言論真實,唔可以有假消息或誹謗言論。法例成立以嚟,雖然 Facebook 都因應越南政府要求刪除虛假賬戶、涉及賭博嘅專頁、反政府言論連結,但阮猛雄就猛烈評擊 Facebook 喺人哋國家經營但又唔遵守當地法律,所以希望越南可以擁有受歡迎嘅本地社交平台,自然更方便控制啦。
資料來源:https://s.nikkei.com/2MrMlCp
相關文章: 【有錯即罰】Facebook 控告程式開發者一間來自香港