【因何出事？】電子機票冇加密 英航客戶個人資料再洩漏
有睇開新聞嘅，都知呢排大家比較關心香港機場發生嘅事，但原來除咗「因航」出事之外，英航亦榜上有名，不過發生問題嘅係電子機票系統。
點解我講「又係」？咁就要回一回帶先，上個月中我哋先講過，英航因為舊年 8 月 21 日至 9 月 5 日期間，被黑客偷走約 38 萬客戶嘅名字、電郵地址、信用卡等資料，結果被英國資訊專員辦公室（ICO）罰款 1.8 億英鎊，破晒所有罰款記錄，以為佢會汲取教訓，點知又出事！
今次出事嘅係佢哋嘅電子機票，外國網站 Threatpost 嘅研究員今年 7 月發現，所有英航透過電郵發俾顧客網上 check-in 嘅連結係冇加密，如果有人用公眾 Wi-Fi 開啟嗰個連結，而咁啱個 Wi-Fi 有黑客潛入咗嘅話，佢就可以直接從連結拎到電話、電郵、英航會員號碼、航班編號等資料，甚至改你張機票！
英航以外 八間公司中招
公平啲睇，呢個漏洞唔係英航獨有嘅，荷蘭皇家航空、法國航空、捷星航空、西南航空、歐羅巴航空等八間航空公司，今年二月都俾研究員發現類似情況，俾客人嘅check-in電郵冇加密，研究員溫馨提示佢哋之後，當中有幾間航空公司都諗緊點補救。
研究員話佢哋一樣有通知英航修正相關漏洞，可惜過咗咁耐，情況依然未有改善，英航只係話乘客嘅護照同埋信用卡資料，唔會因為咁而洩漏出去……潛台詞即係話，都冇唔見到乜嘢重要資料，唔使緊張。唔通又要好似上次咁搞到罰款，佢哋先會做嘢？
相關文章：【罰1.8億英鎊】洩38萬客人資料英航罰款破晒記錄
