【報名參軍！】出席DEFCON 有機會喺五角大樓返工
DEFCON 網絡安全大會，每年都吸引到好多業內高手或黑客出席；所以如果你所屬組織長期需要呢一方面嘅專家，呢類型嘅黑客大會就係最佳揀蟀機會。好似喺今次大會，就連美國國防部人員都到場，目的就係說服有識之士為國家效力！
五角大樓長期缺人
今次 DEFCON 其中一個亮點，就係將成間醫院嘅設備搬咗入 BioHacking Village 俾大家試 hack。但同一時間，喺今屆首設嘅 Aviation Village 入面，亦放咗部 F-35 戰機駕駛模擬器喺度俾入場人士了解下。喺啲咁嘅場合，美國國防部有人喺度絕對合理，但呢個剛啱喺今年 4 月上任嘅 Defense Digital Service（DDS）https://dds.mil/ 總裁 Brett Goldstein，喺接受訪問時就話今次唔係嚟玩或有特別國防任務，出席純粹喺為部門搵新血。
到底 DDS 負責啲乜嘢工作呢？其實呢個部門係專為提升國家喺科技方面嘅防禦力，例如喺 2016 年就推出賞金獵人計劃，邀請黑客「Hack the Pentagon」，希望透過賞金獵人去挖掘五角大廈嘅防禦漏洞。Brett 指現時 DDS 大約有 70 個員工，合約期大約係兩年，令部門可以保持新思維同引入唔同嘅專家，所以部門隨時都處於招聘狀態。
黑客高手市場搶手
Brett 話政府部門深明國防系統嘅網絡安全係一場唔會打完嘅仗，必須持續挖掘及堵塞漏洞，好似上星期 DDS 先透過賞金獵人計劃，發現美國空軍喺雲伺服器上嘅 54 個漏洞，所以即使美國空軍本身有一支黑客隊伍，但實際上都係無力搵出所有漏洞。不過，Brett 話喺黑客大會上求材都唔容易，首先要說服黑客為國家效力已經唔容易，其次係有實力嘅黑客真係大把公司爭住請，唯一武器就係成為國防部黑客可以為保護人民出一分力。另一方面，國防部亦要確保投身國家嘅黑客唔可以係 Black Hat，否則只會為國家添煩添亂。
