【DefCon 開鑼】成間醫院搬入嚟任hack
作為資安界一分子，每年都會特別留意幾個關於網絡安全嘅全球盛事，DefCon 自然喺名單之上，呢個喺 1993 年由「黑客之神」Jeff Moss 搞嘅大會，嚟到今年已經係第 27 屆，每年都會喺拉斯維加斯舉行，吸引全球黑客高手參加。大會高手如雲，上年更有個 11 歲小朋友，只用咗 10 分鐘就成功入侵美國選舉網站，成為一時熱話。
今屆大會啱啱喺美國時間星期四（8月8號）開鑼，而焦點就落喺 BioHacking Village 身上。其實 BioHacking Village 唔係新嘢，過往幾屆都有搞，但通常都好細規模，可能一張細枱放幾部醫療儀器俾人 hack 下就算；不過由於今年發生過好多「醫療事故」，例如心臟起搏器、胰島素自動注射器相繼被發現漏洞，甚至有黑客向多間醫院發勒索電郵，令到醫療界唔再認為網絡保安同佢哋無關，所以出錢又出力搞今年嘅BioHacking Village。
DefCon模擬醫院
BioHacking Village 負責人 Nina Alli 話，今年直情喺會場起咗間模擬醫院，成個場景同病房一模一樣，佔地2600平方呎，擺滿晒平時會用嘅醫療設備，仲搞咗個黑客比賽，等高手「測試」一下啲醫療設備到底安唔安全，而參與嘅 10 間大型醫療設備生產商包括 Philips Health、Medtronic、雅培藥廠、Becton Dickinson 等等，就負責提供現場嘅醫療設備，同埋派公司內部專家到場，睇下產品有咩地方要改善，部分仲出錢支持今次盛事，可以見到業界今次幾咁重視。
主辦單位話近年已開始有唔少醫療設備生產商，肯將產品交俾黑客測試，但仍係小眾，市場上仲有千千萬萬款醫療設備仲未加入測試行列，尤其係出產年份比較久遠，但醫院仲用緊嘅醫療裝置，設計時根本無考慮過被入侵的可能性。獨立網絡安全研究員 Adrian Sanabria 補充，唔只產品設計存在漏洞，醫護技術人員操作時亦掉以輕心，設定完部醫療設備後，唔記得將模式由設定（configuration mode）轉返去臨床模式（clinical mode），咁就增加咗俾黑客入侵嘅風險，所以醫療界真係要認真留意保安問題，病人先會得到保障。
相關文章：【無差別殺人】Medtronic 懶理胰島素注射器漏洞專家整殺人 app 示範後果
