【出師未捷】俄羅斯國家級黑客 轉攻企業 IoT 裝置詭計敗露
2020 年係選舉年，唔單只美國同台灣選總統，多個歐洲地區議會都舉行直選，因應形勢，微軟今年年初已經喺歐洲推出咗 AccountGuard 網絡安全服務，專幫政治團體、半政府或非政府組織、智庫、研究所、外交關係協會之類嘅機構搞網絡保安，抵禦一班嚟自伊朗、北韓同埋俄羅斯嘅國家級黑客。
其中特別鎖定嚟自俄羅斯嘅黑客團隊 STRONTIUM（又名 Fancy Bear 或者 APT28），梗係啦，呢個團隊好出名，美國政府曾點名指控佢哋喺上屆總統大選時，參與攻擊民主黨全國委員大會伺服器，之前佢哋亦都入侵過奧林匹克委員會，舊年亦試過大規模感染 Linksys、TP-Link、華碩、D-Link 等牌子嘅路由器，「戰績」幾咁彪炳！
不過，微軟月頭發表報告就話佢哋有新玩法，4 月時發現 STRONTIUM 班友分別連上幾間私營企業嘅 VoIP 電話、打印機同埋影片解碼呢三種 IoT 裝置，三次攻擊入面，有兩次係利用 IoT 裝置嘅出廠預設密碼入侵（提咗大家好多次要改密碼㗎啦），另一次就係個裝置嘅 firmware 未更新得切，俾黑客有機可乘。
微軟嘅研究人員認為，入侵 IoT 裝置唔似係黑客嘅最終目標，估計佢哋成功入侵後，就會用類似 tcpdump 嘅小程式偷聽公司網絡上嘅活動，吼準機會再入侵埋，但係因為三單入侵都好好彩喺一開始就俾微軟搵到，所以無辦法知道 STRONTIUM 下一步行動係乜，總之緊記定期幫 IoT 裝置改密碼同埋更新 firmware，就唔會咁易出事喇！
相關文章：【big big channel】200萬監控鏡頭免費任睇
