【掌聲鼓勵】No More Ransom 已為苦主慳返 1.08 億
專門幫助慘遭勒索軟件攻擊嘅「No More Ransom」（拒絕勒索軟體）計劃剛剛慶祝成立 3 周年，計劃自 2016 年 7 月至今，共幫助超過 20 萬名苦主免費解鎖，慳返約 1.08 億美元贖款。團隊加油，繼續幫苦主鬆綁！
No More Ransom 計劃成立以嚟，其中一場勝仗必定要數 GandCrab。自 2018 年 2 月推出第一款解鎖工具，No More Ransom 已先後發表過兩次更新，最後一個版本更將所有版本嘅 GandCrab 破解，提早喺開發 GandCrab 嘅黑客公布嘅退休日子前送佢終，總共幫超過 4 萬個苦主慳返合共 5 千萬美元贖款，絕對值得掌聲鼓勵！
No More Ransom 網站支援 35 種語言
呢個計劃嘅成立要回溯到 2016 年 7 月，當時歐洲刑警組織、荷蘭警方及兩間網絡安全公司展開「No More Ransom」（拒絕勒索軟件）計劃，透過與不同執法機構及資訊科技界合作，積極打擊加密勒索軟件，設立網上平台 www.nomoreransom.org，為公眾免費提供分析勒索軟件、網上資料庫、解密工具等服務。計劃至今同超過 150 個機構合作，共提供 109 款解鎖工具，單單於 2019 年已經新增 19 款解鎖工具，而且為咗令更多人受惠，網上平台共有 35 種語言供選擇，唔怕睇唔明。
當然，勒索軟件依然肆虐，而且計劃提供嘅解鎖工具往往要一段時間先推出，所以大家不容忽視，好似最近期嘅受害者要數幾日前南非最大城市約翰內斯堡嘅電力公司 City Power，網絡系統、資料庫、應用程式全數被打包，部分用戶停電近 12 小時，非常濕滯。
不過，歐洲網絡犯罪中心（European Cybercrime Centre, EC3）總裁 Steven Wilson 講得啱 — No More Ransom 除咗為苦主帶來希望，更重要嘅係向惡勢力發出最清晰嘅訊息：全世界聯手，為正義而戰！
相關文章：【退休宣言】SaaS 成功個案？ GandCrab 開發者兩年賺 3 億美元服務費
