【重要嘅事情】快啲、快啲、快啲升級 iOS 12.4 系統
請立即更新 iOS 裝置嘅系統，呢句說話已經講咗唔知幾多次。不過，而家又要再講多次喇，因為 Google Project Zero 團隊早前向 Apple 提交 6 個 iOS 漏洞，雖然 Apple 喺新推出嘅 iOS 12.4 版本已經解決其中 5 個，仲有一個未解決到，但起碼減少被黑客攻擊嘅風險丫。
Project Zero 係 Google 一隊專門研究網絡安全漏洞嘅團隊，佢哋特別針對零時差攻擊（Zero Day attack）漏洞，以減少未知嘅網絡攻擊造成嘅損失。早前團隊嘅成員 Samuel Groß 及 Natalie Silvanovich 就喺 iOS 作業系統上發現咗 6 個漏洞，包括記憶體崩壞（memory corruption）、釋放記憶體（use-after-free）等等，黑客可以透過引誘用家點擊 iMessage 接收到嘅惡意訊息，發動遙距執行惡意代碼攻擊，唔單只可以讀取 iOS 裝置內嘅檔案，更可以取得完整嘅控制權，過程中係唔需要再牽涉用家參與，可以話係非常嚴重嘅漏洞。Project Zero 專家更話，其中一個漏洞一旦被利用，要救機嘅唯一方法只得剷除裝置內所有資料添。
升級 iOS 12.4 後無得返轉頭
根本漏洞嘅嚴重性，網絡安全專家估計今次發現起碼值 1000 萬美元。Apple 為咗修補漏洞，之前就推出咗 iOS 12.4 版本更新檔，不過，Project Zero 專家就話新版本只係修補咗當中 5 個漏洞，所以佢哋公開嘅漏洞詳情入面，並未包含最後一個漏洞嘅資料，希望 Apple 可以喺期限前進行修補，以免有用家受害。雖然 iOS 12.4 未係最安全，但起碼減少咗被攻擊嘅風險，加上呢 5 個漏洞嘅詳情亦已公開，即係有黑客已知道點樣進行攻擊，而且由即日起，Apple 已取消咗 12.3 、12.3.1 、12.3.2 嘅認證，代表用家升級後唔可以通過 iTunes 嚟回復以上版本，可見漏洞嘅嚴重性有幾高。所以長氣都要講多次，請立即更新 iOS 系統上 12.4 版本喇。
相關文章：【下載保平安】iOS 13 更新未出先興奮三招守護個人私隱
