【講埋出口】蜻蜓計劃唔只壽終正寢 Google 確認撤回！
上年 Google 被美國網上媒體 Intercept 揭發為咗重返中國市場，啟動咗滿足國策嘅「蜻蜓」（Dragonfly）搜尋引擎計劃，員工即刻反枱，強烈要求撤回計劃。不過，管理層一直龜縮，只係靠語言偽術回應。好消息係，Google 高層終於講到明終止（terminated）研發，有請小鳳姐！
語言偽術難得逞
為咗呢隻蜻蜓，Google 管理層同員工都搞得好僵，上年 8 月總共有 1,400 個員工聯署要求終止計劃，唔好為咗搵錢而跪低。管理層雖然喺 12 月叫停計劃，但由員工自發嘅「搜證組」又喺今年一、二月喺公司內部嘅開發平台上，發現計劃兩個手機搜尋應用軟件「茅台」（Maotai）及「龍飛」（Longfei）嘅程式碼被更新超過 400 次，明顯計劃依然暗中進行緊。當時 Google 管理層都有出嚟澄清，不過只係話無計劃喺中國推出搜索器服務。須知「無計劃推出」同「唔會推出」係兩回事嚟，Google 嘅員工咁高班，又點會俾呢啲低級語言偽術耍走？
事件一直拖拖拉拉，據指陸陸續續有高級職員劈炮。卒之到咗前兩日，當 Google 嘅公共政策副總裁 Karan Bhatia 出席美國參議院司法委員會聽證會時，被公和黨參議員 Josh Hawley 問及 Google 喺中國嘅業務發展問題，Bhatia 除咗回應咗一系列狀況之外，仲特別強調 Google 已經終止咗蜻蜓嘅開發計劃，老調重彈話無計劃喺中國推出搜尋服務，臨尾仲要不失霸氣地強調其實 Google 喺 3 月已經回應咗，但事實上，當時即刻加碼有 4,000 員工聯署要求終止計劃，唔可以講「無計劃推出」就了事。
正如之前所講，有時字眼呢啲嘢真係要好斟酌，好似涉及商業糾紛嘅仲裁，鬧上法庭嗰陣唔斟酌合約上嘅字眼，仲可以斟酌啲乜？所以今次管理層開金句確認終止蜻蜓計劃，相信班員工終於可以放心。
相關文章：【賣藝唔賣身】Google 員工怒捉蜻蜒
