【真係危機】Airbus A350 漏洞 149 個鐘要 reboot
歐洲航空安全局（EASA）早前更新咗對 Airbus A350-941 型號客機嘅適航指令（airworthiness directives），指呢架客機存在安全問題，連續著機 149 個鐘就要 reboot 系統一次，但查實呢個指令兩年前已推出，而 Airbus 足足兩年都無修補到⋯⋯
適航指令係由全球各地嘅民航監管機關所發出，當監管機關發現某型號飛機或系統存在安全隱憂，就會發出強制性指令俾飛機所有者及操作者，要佢哋跟住指令嘅內容執行。而 EASA 向 Airbus 發出嘅適航指令，指出呢款客機喺連續著電 149 個鐘前，就要熄機 reboot 一次，否則機上嘅航空設備或網絡就會失聯，甚至影響某啲核心功能嘅模組失控。根據資料顯示，受影響嘅控制模組，具有管理燃油系統、調整機艙壓力、供氧、機翼除冰以及降落等等，換句話即係非常重要嘅模組嚟，如果失控，真係好大件事。
而 Airbus A350-941 會出現呢個安全隱憂，原因係當飛機系統連續運作一段時間後，系統就會出現 memory overflow，令到控制系統死機。唔單只 Airbus 出事，A350 嘅主要對手 Boeing 787 Dreamliner 亦係 2015 年被發現相同問題，必須喺運作 248 日前將引擎 reboot。不過，Boeing 好快已為系統推出修復軟件，但 Airbus 就繼續遵照指令建議，喺連續著電 149 個鐘前 reboot。或者有人會問每次飛機都係飛幾個至十幾個鐘，影響應該唔大丫，但其實返到停機坪後，檢查人員係會繼續著住機做安全檢查或維修，所以都有可能喺完成安檢後就直接載客飛走。
至於呢一批有安全隱憂嘅客機，有唔少航空公司都用緊，包括大家熟悉嘅 Cathay Pacific、新加坡航空、Qatar Airways、Finnair 等等。下次買機票前，係咪都要檢查埋飛機型號先好啲呢？
相關文章：【罰1.8億英鎊】洩38萬客人資料 英航罰款破晒記錄
