【老貓燒鬚】俄羅斯情報機關竟然俾人hack！
最鍾意入侵其他國家網絡嘅俄羅斯情報部門「聯邦安全局」（FSB），竟然都有俾人 hack 返轉頭嘅一日！俾黑客組織提取咗 7.5TB 機密資料！
同大家做少少功課先，講起俄羅斯情報部門，大家可能只係識 KGB，但其實而家已經俾 FSB 取代，佢嘅角色類似美國聯邦調查局或英國軍情五處差唔多，但負責嘅範籌就更加多，而且直接向俄羅斯總統匯報，可想而知有幾巴閉。
事緣上兩個星期，一個名為 0v1ru$ 嘅黑客組織成功入侵 FSB 主要外判商 SyTech 嘅伺服器，偷走入面 7.5TB 嘅資料不突止，仲將 SyTech 網站首頁換成 Yoba Face 大頭公仔，留下「到此一遊」嘅證據，可以話係攞晒彩！
不過黑客組織覺得仲未夠，件事尚未搬上國際層面，所以就將所有資料交俾更大型黑客組織 Digital Revolution，由佢哋將件事 上 Twitter，同埋爆料俾各大傳媒，令件事衝出國際，搞到俄羅斯當局相當無面。無獨有偶，Digital Revolution 之前都計劃過入侵 FSB，至於佢同 0v1ru$ 之間係咩關係就冇人知喇！
當然大家最關心嘅係 7.5TB 資料到底有冇料到？結果都有唔少實料嘅，當中提及 FSB 呢幾年做過嘅 projects，包括蒐集 Facebook、LinkedIn、MySpace 等社交網絡資料嘅 Nautilus、搜索同埋監視俄羅斯企業嘅 Mentor、令俄羅斯互聯網與外間隔絕嘅 Hope 等等，每個 projects 都有齊 FSB 所用嘅手法同目的，方便大家 Fact Check 對照。
