【全城熱話】公安監控軟件 MFSocket 硬取手機資訊

最近國內外網民均熱烈談論一個監控軟件 MFSocket，公安會強行於被調查者嘅手機上安裝，提取手機內嘅資訊。MFSocket 究竟係乜東東？故事更牽連香港反送中？

事緣最近內地有唔少人被公安「請」去協助調查，有猜測係因為轉發香港嘅反送中報導。坊間傳出，北京及上海已有好多人被邀請。紀實攝影師兼 Visuals Editor 肖慕漪（Muyi Xiao） 6 月 21 日喺  Twitter 發帖，引起大家關注 MFSocket 軟件，網民之間亦熱烈討論，更出現好多對 MFSocket 進行詳細調查嘅文章及報導。

MFSocket 裝完即刪

就資料所得，MFSocket 背後嘅開發者係 Meiya Pico（美亞柏科信息股份有限公司），總部位於福建省厦門市。Meiya Pico 喺全球電子數據取證行業龍頭之一，專門為執法機關及客戶取證，當然包括手機取證。

亦有文章講述「被調查」經過：被邀請到公安局之後，先拍照，掃描指紋及掌紋。交出手機後，公安會用一部類似手機嘅裝置連接，並喺手機強行安裝 MFSocket 軟件。Elliot Alderson 於文章指出，MFSocket 會向手機提出不同請求，包括提取手機內嘅資料包括通訊錄、短訊、日曆、通話記錄、記事本、位置信息、視頻、錄音、影像、程序列表、系統日誌、各類軟件信息等。此外，MFSocket 更會執行 server and receive 指令，當然，手機資料會 send 去邊個 server？你懂的。

正所謂鬼鬼鼠鼠偷番薯，MFSocket 嘅 Android 版本喺安裝後，開始時會自動切斷手機嘅網絡連接（WiFi 及數據同時切斷，以防手機數據聯網刷新），同時，裝置連接移除時，MFSocket 軟件亦會自動刪除。

另外，有文章指出，iOS 系統比 Android 安全，未必可以攞到咁多信息；同時如果手機中有「VPN」字眼 app 會比較容易引起公安關注。有網民非常擔心，集思廣益下有人建議買部外殼一樣嘅替身機，若遇上被調查時可以頂當；亦有網民提議如果手機已經 root 咗，可以安裝 HiedaNaKan 開發嘅 FuckMFS，以對抗 MFSocket 之類嘅監控，但成效有幾大呢？

資料來源：https://bit.ly/2Jrw5P4、https://bit.ly/2O5oxGl

相關文章：【滴水不漏】3億內地網民私訊網上任睇