【秋後算帳】市政府交完贖金 炒 IT 阿頭祭旗十個嬲
早前報導佛羅里達州兩個巿政府齊受勒索軟件襲擊，兩個市政府最終決定交贖款了事，其中人口大約 12000 人嘅 Lake City 跪低向黑客支付 42 個 Bitcoin （約價值 46 萬美元）後，秋後算帳就正式開始，搵咗個 IT 主管出嚟問責，兼夾革職祭旗。究竟點解要佢揹呢隻鑊？
Lake City 乃佛羅里達州一個小市鎮，官方形容今次保安事故係連中三元（triple threat）。事源有個濕滑嘅同事收咗個有毒電郵，粗心大意地下載咗個受感染嘅檔案，引發連鎖反應：先中木馬程式 Emotet，引入另一個木馬 TrickBot 以及勒索軟件 Ryuk。Ryuk 蔓延至 Lake City 其他系統，包括伺服器、電郵、電話線路，幸好警察及消防系統未受波及。
市議會召開緊急會議，搵晒 FBI、資安專家、顧問，結果估計只能夠解開勒索軟件 Ryuk 鎖死檔案嘅 3％ 至 5％，而且成本相當高，既然無晒辦法，所以市議會先會冒風險交贖款。
美國唔少地方嘅電腦都係黑客目標，單單今年頭 4 個月就有 21 宗事故。同屬佛羅里達州嘅 Riviera Beach 率先跪低，向黑客交出咗約 60 萬美元贖金，兩周後就輪到 Lake City。其實交唔交贖款一直備受爭議，FBI 指出向匪徒妥協只會縱容罪犯；此外，交咗贖金唔代表解決晒問題，有唔少個案係交贖款後都攞唔返啲檔案。另外，電腦系統內好多時仲有大量病毒未清，成個系統都係問題多多周身病。
交完贖款，市議會決定向負責嘅同事問責，捉咗 IT 部主管 Brian Hawkins 出嚟炒魷，但明明中招打開電郵嘅係另一個同事喎！IT 部主管點解要負全責呢，是咪以後要 block 晒所有電郵，唔俾同事上網先可以自保？相信先前中招嘅 Riviera Beach 嘅 IT 部主管，以及早幾日加入勒索軟件受害者行列嘅佛羅里達州 Key Biscayne 嘅 IT 部主管，一定有排驚！
相關文章：【起雙飛】員工疏忽勒索軟件癱瘓佛羅里達州兩個市政府
