【試下無壞】QRishing 瀨尿牛丸式電郵攻擊易上當
呢個方法唔得，咪試下另一個方法囉！呢句說話大家都講過唔少，同時間亦係黑客高手嘅處世態度，所以先可以創造咁多攻擊方法出嚟。最近有網絡安全研究員發現，黑客又喺釣魚電郵攻擊手法上加多重掩飾方法，通過 QR Code 將目標人物帶離公司嘅防禦系統，再利用心理盲點令對方輸入公司帳戶登入資料，雖然唔係百分百成功，但都係果句，試下無壞丫。
今次被研究員發現嘅 QRishing 攻擊手法，針對嘅攻擊對象係法國公司 Cofense 嘅僱客。攻擊首先由一般嘅釣魚電郵開始，目標人物會收到一封標題為 Review Important Document 嘅電郵，叫佢哋利用附件嘅 QR Code 去讀取一份重要嘅文件。如果目標人物用手機 scanner 跟住照做，黑客就會引導佢哋去到一個虛假嘅 SharePoint 登入網站，由於呢個網站係企業常用嘅內部管理系統，所以好易有目標上當，跟手輸入埋 AOL、Microsoft 等公司帳戶登入資料，令黑客可以進入公司內部，從而發動其他攻擊，最終盜取管理員帳戶登入資料，成功入侵公司網絡。
QRishing 點嚟？
網絡安全專家指出，呢種結合 QR Code 及釣魚電郵而成嘅 QRishing 攻擊，其精要在於可以引導目標人物由防禦力較強嘅電腦，轉而到智能手機之上，因為如果用電腦開啟釣魚連結，電腦上嘅防毒軟件有好大機會攔截到呢嘅連結，但呃手機就容易得多。而另一個精要係，當目標人物睇到呢個同工作有關嘅釣魚電郵時，心理上係處於工作狀態，所以當要輸入登入資料時，就會傾向輸入公司帳戶。QRishing 呢種攻擊方法，原來喺 2012 年已有大學研究提出，可能大家會覺得唔算特別，但就正如瀨尿蝦加牛丸一樣，溝埋一齊嚟做可能會有 1+1 以上嘅加乘效果！
相關文章：【唔係倫敦金】提防 變臉詐騙 電郵 London Blue 轉攻亞洲企業
