【呢鋪真係斷正】犯案期間跌「身份證」黑客連累朋友坐監
其實我好怕用 USB 手指，雖然係好方便，隨時拎出嚟就可以抄嘢走，但係啲手指愈出愈細隻，好易跌咗都唔知。咁當然啦，普通人跌隻 USB手指，最多唔見咗啲資料，如果有做 backup 嘅，問題都唔大，但如果係黑客跌咗 USB 手指，就分分鐘監都有得坐！
點解咁講？事關比利時最近發生咗件好有趣嘅事：話說有位 35 歲嘅仁兄俾比利時警察拉咗，因為佢向當地一間叫做 Crelan 嘅銀行辦公室掟汽油彈，佢之所以俾比利時警方拉到，係因為掟汽油彈時唔小心跌咗隻 USB 手指，比利時警方就係憑隻手指入面嘅資料確認到佢身份。
但係呢個唔小心嘅代價就認真大，比利時警方慢慢研究 USB 手指入面嘅資料，再加埋去佢屋企搜證，就發現佢除咗掟汽油彈外，仲曾經向 Crelan 銀行發動 DDoS 網絡攻擊，要脅銀行俾錢佢先肯停止攻擊。佢喺庭上自辯時，就話因為間銀行令佢阿媽損失咗超過 30 萬歐羅，佢多次同銀行交涉都冇人理佢，先做咁多嘢嚟報復。
聽落以為佢係個孝子，點知比利時警方再喺 USB 手指入面，發現佢同 Anonymous Belgium 呢個黑客組織有連繫，仲同多宗以 Cyber Crew名義犯下嘅網絡罪案有關，當中更包括入侵國際足協網絡，亦曾經向某間薄餅店發動 DDoS 攻擊，要脅對方俾錢先會解除攻擊，可以話係犯案纍纍，好明顯係一個慣犯，所以法官唔接受佢自辯嘅講法，預計判佢咁多單嘢加埋要坐四年半監，仲要向銀行賠償 3000 歐羅，彌補因受 DDoS 攻擊所帶嚟嘅損失。
件事仲未完，原來 USB 手指入面仲收埋唔少同黨嘅資料，其中一個 44 歲嫌犯已經俾比利時警方拉咗，睇嚟陸陸續續會有更多人被捕，今次真係多得呢位「豬隊友」唔少！
相關文章：【是咪咁巧合？】自遊 Site 至愛 Telegram 遭受國家級 DDoS 攻擊
