【識聽民意】IG 助用戶奪回被黑客盜用帳戶
好消息，Instagram 識聽民意推出新安全措施，即使用家嘅帳戶被黑客所奪，用家都可以靠新方法奪回，唔使再驚辛苦經營嘅帳戶俾人搶走！
名人明星多受害者
每隔一段時間，就聽到名人或者 KOL 嘅 Instagram 帳戶被黑客盜用，受害人包括萬人迷碧咸、樂壇天后 Lady Gaga、韓國暖男李鍾碩等等，就連老佛爺愛貓 Choupette 嘅 IG 帳戶都俾黑客入侵過。舊年我哋曾經報導過幾百個 IG 帳戶被 hack 事件（https://bit.ly/2zhZHsO），受害者就算喺 IG 設定咗雙重認證，都未必可以攞返個帳戶。你知啦，一般人無咗個帳戶，都可以重新開個新 account，叫親朋戚友 follow 返，最多都係煩少少啫；但名人同埋 KOL 話晒靠 IG 搵食，無咗個辛苦經營嘅帳戶真係慘過死！運氣好少少或者名氣大啲嘅，可能 IG 會受理出手，其他人就分分鐘焗住向黑客交贖款，先可以買返帳戶持有權，認真無奈。
聽民意加強驗證條件
作為咁大間社交媒體公司，咁嘅服務態度當然好難令人收貨，結果喺大家不斷投訴之下，IG 終於肯「聽取民意」，喺今個月 17 號推出新安全措施。當用戶發現登入唔到帳戶，只要點擊「需要更多幫助」選項，IG 就會提示用戶輸入註冊時所使用嘅 email 地址或電話號碼，就會收到一個六位數字編碼，咁就可以登入返帳戶，即刻重設密碼。
聰明嘅你當然會噓出嚟，而家個問題咪就係黑客有可能同時攞到呢啲 2FA 驗證編碼囉，咁點夠佢快啫？咁你就錯喇，今次 IG 除咗會驗證編碼，仲會檢查埋你用嚟重新登入果部手機，係咪你經常用開果部，所以黑客就算拎到六位數字編碼，只要唔係同一部手機入返都冇用。另外 IG 亦明確表示話就算黑客連用戶名都改埋，受害用戶都可以改返原名繼續使用。對於用家嚟講，就多返少少保障喇！不過，呢個功能暫時只會開放俾 Android 用家使用，iOS 用家就唔知幾時至有喇。
相關文章：【密室上網】Google 2FA 驗證工具出錯 登入帳戶要離人 9 米
