【暴風雨前夕】亞太區供電 ICS 系統被鎖定 黑客隨時斷電製造火災
有網絡安全專家發現，專門中東地區攻擊燃油設施嘅黑客集團，正喺度開 turbo 收集亞太區供電設施嘅 ICS 系統登入身份，似乎準備大開殺戒！
工業控制系統（Industrial Control System, ICS）掌管住全個國家嘅命脈，好似發電網、供水系統、水壩、運輸網絡、核電廠等設施，都係經過 ICS 管理，所以如果發生國家之間嘅戰爭，ICS 好自然會成為攻擊目標之一，可以造成斷水斷電斷物流，國家就會陷入一片混亂及恐慌。呢啲管理系統咁重要，黑客集團亦唔會放過攻擊機會，不過由於各工業採用嘅 ICS 系統及技術都有分別，投入嘅成本高，所以黑客集團通常只會瞄準一個地區或其中一個行業發動攻擊。不過，網絡安全研究組織 Dragos 嘅專家就發現，呢個潛限制已出現變化，其中一個俄羅斯黑客集團 XENOTIME ，開始由專注攻擊燃油區塊，擴闊至供電設施，出現跨區塊攻擊。
ICS 系統安全性癱瘓
XENOTIME 係世界上其中一個最危險嘅黑客集團，喺 2017 年， XENOTIME 曾瞄準中東沙地亞拉伯嘅燃油化工廠，利用惡意軟件 TRISIS ，向 Schnedier Electric 嘅 Triconex System 發動攻擊，企圖令把守工業系統最後安全防線嘅運作失效。專家指出 TRISIS 除咗會奪取 ICS 控制權，仲有能力癱瘓安全系統，即使工業裝置因超載而有可能發生著火等危險，系統亦唔會嗌停，隨時出現人命損傷。專家曾將 TRISIS 拎嚟同 2010 年攻擊伊朗核設施嘅 Stuxnet，以及 2016 年令烏克蘭大停電嘅 Industroyer 惡意軟件比較，發現同樣可癱瘓安全系統，造成物理破壞。不過，TRISIS 最終並無向燃油化工廠發動最具破壞力嘅攻擊。
之後，XENOTIME 除咗向中東地區嘅燃油工業系統虎視眈眈，仲開始伸延魔手至北美及歐洲地區。黑客集團會大規模掃描網絡上存在嘅漏洞，亦會透過攻擊 ICS 供應商及生產商嘅網絡，企圖滲透潛伏，等待向目標發動供應鏈攻擊（Supply Chain Attack），喺源頭將惡意軟件透過目標企業採用嘅第三方供應商，安裝至對方嘅 ICS 上，攻擊手法多樣化。而去到今年二月， Dragos 專家更發現 XENOTIME 開始搜集美國及亞太區供電設施嘅資訊，而且亦盜取緊登入呢啲系統嘅身份及密碼，似乎正準備轉移地域及跨工業區塊發動攻擊，所以先至提醒各 ICS 供應商及製造商，以及各國政府及公用設備管理機構，要盡快加強 ICS 系統嘅保安能力喇！
相關文章：【港鐵出事警號】 SCADA/ICS 系統失陷引爆大災難
