【要求職先犯案？】參加黑客大賽 光明正大求職良機
想俾人 head hunt，大家而家都識得主動出擊，利用 LinkedIn 呢類職場社交平台嚟增加曝光率及被搜尋機會，唔會再只係靠 agent 咁傻仔。而作為電腦程式高手，可能仲會多一個途徑，好似澳洲一個 13 歲嘅小朋友，以虛假帳戶登入 Apple 公司伺服器，偷走 90 GB 機密資料，目的就係搏 Apple 會請自己！
另類求職方法
2015 年犯案時，呢個小朋友只係得 13 歲，而家已經 17歲喇；以香港教育制度嚟講，當年佢只係讀緊初中。最近佢因為案件而被送上澳洲少年法院受審，控方指呢個小朋友當年利用自己嘅電腦技術，製造虛假帳戶冒充 Apple 員工進入系統偷取資料，而且事後亦喺佢部電腦入面搵到相關資料，人贓並獲。由於已經斷正，小朋友又承認所犯罪行，不過辯方求情時就指出，小朋友犯案時年小無知，估唔到有咁大後果，佢只係「參考」咗歐洲黑客嘅同類事件，雖然犯案後會被拉，但最終都會被對方聘用，所以先至有樣學樣，只係咁啱揀中 Apple 嚟攻擊。
黑帽變白帽
地方法官最後都相信辯方嘅理由，只係輕判小朋友守行為 9 個月同埋繳付約港幣 4000蚊嘅保釋金，當然亦例牌咁勸籲佢要將天賜嘅才能用喺正途上面。結局皆大歡喜，雖然唔知道呢個少年天才有無被大公司聘用，但「修成正果」嘅黑客的確有唔少例子，好似以下呢幾個咁：
Kevin Mitnick
犯案纍纍，曾非法闖入 Digital Equipment Corporation 網絡，甚至攻陷國防系統盜取資料。監禁 5 年後，受聘成為網絡安全顧問，之後仲開埋自己嘅公司 Mitnick Security Consulting，有黑客之神嘅稱呼。
Owen Thor Walker
18 歲時協助黑客集團編寫蠕蟲程式，造成過百萬部電腦被破壞，程式更被黑客集團利用來進行信用卡詐騙，造成 2000 萬美元損失。被捕後因沒有直接參與犯罪活動而未有被判監禁，僅罰款了事，其後獲新西蘭電訊公司 TelstraClear 聘用。
Sven Jaschan
德國少年黑客，2004 年編寫嘅 NetSky 病毒，據防毒軟件公司 Sophos 指出當年 70% 嘅電腦感染都同呢種病毒有關，Microsoft 更懸紅 25 萬美元要搵出病毒設計者。其後 Jaschan 被捕，但喺等候受審期間，已被德國網絡安全公司 Securepoint 聘用。
黑客大賽上位良機
所以話，靠入侵大公司網絡上位嘅諗法係幾咁正路。不過，有實力嘅黑客，已經唔使再以身犯法，因為而家有唔少由大機構舉辦嘅黑客比賽，名正言順通過賽事聘用有才能嘅人，好似羅兵咸永道會計師事務所（PricewaterhouseCoopers, PwC）就會喺 6 月 20 日舉行 HackaDay 2019，邀請咗本港八隊大學生及澳門兩隊大學生參賽，喺限時內拆解設下嘅難題。今年特別加入咗同區塊鏈有關嘅任務，等參加者嘗試搵出聲稱無法篡改交易紀錄嘅區塊鏈技術嘅破綻。最重要係勝出隊伍會得到 PwC 一年嘅實習經驗，你話幾咁勵志呢？
PwC HackaDay 2019
日期：6 月 20 日（Thu)
時間：8:30 am 至 4 pm
地點：Cordis Hotel, Mongkok
網址：https://pwc.to/2MpogNI
