【有排驚】 Cisco 企業級路由器 嚴重漏洞有待修補
Cisco 1001-X 系列路由器並唔係家用裝置，而係一個（應該要）非常穩陣可靠、專攻企業使用嘅網絡裝置。今次發現嘅問題出喺信用錨（Trust Anchor）驗證基制之上，黑客可透過漏洞喺源頭繞過驗證，非常大鑊！
兩大漏洞攻破不可能
最近有研究員發現 Cisco 1001-X 系列路由器存在極大漏洞，容許黑客遙控攻擊，控制裝置並可以獲取所有經過路由器嘅訊息及指令。資安公司 Red Balloon 研究員解釋，今次總共發現兩個漏洞：第一個為 Cisco 嘅 IOS 執行系統漏洞，相對上簡單，屬小兒科，一般修補方案更新就搞得掂；第二個就麻煩喇，因為關乎信任鍊（Chain of Trust）嘅驗證問題。
Cisco 喺 2013 年開始為所有企業級產品加入信用錨驗證系統，而今次研究人員發現，黑客有可能從上述嘅第一個漏洞，進行取得權限繞過裝置嘅信用錨驗證基制，意味著黑客可以隨意改動路由器而仍然可以被標籤為「可信」，導致 Cisco 咁耐以嚟售出嘅數以千萬計裝置，都曝露喺黑客攻擊嘅風險之下，而且更包括企業級路由器、 Network Switch 以及防火牆等，非常大鑊。
近年唔少網絡裝置供應商，都會喺裝置嘅電腦主機板劃出一個安全兼無法修改嘅區域，呢個區域被稱為 secure enclave ，用嚟喺開機時驗證系統程式有無俾黑客修改。無論你係一般用家抑或管理者，都無辦法改變內裡嘅設定，理論上，由於 secure enclave 唔會被修改，應該最為安全，而唔同供應商對 secure enclave 有唔同叫法，例如 Intel 稱之為 SGX，Arm 就叫 TrustZone，Apple都有secure enclave，而 Cisco 就叫佢做 Trust Anchor。Trust Anchor 係 Root Certificate，同之後嘅驗證關卡組成一條信任鍊，環環相釦。
Cisco 源頭漏洞未能即時解決
不少電腦工程師會視 Trust Anchor 為最可靠嘅驗證方法，因為從源頭開機，就會開始進行驗證。不過，如果只依靠單一個驗證方法把關，其實非常之冒險。因為已經有研事人員成功地證明咗，Trust Anchor 係可以破解嘅。而最最最大鑊，莫過於 Trust Anchor 被破，黑客就可以製造假證書，順利通過之後嘅檢查關卡，令整個系統好似無事發生過一樣，呢一次 Cisco 1001-X 嘅問題正正如此，由boot process 開始中招，堪稱源頭瀨嘢。
Cisco 已就事件宣布將會推出更新檔，然而未有提及係咪直接修補同 Trust Anchor 有關嘅漏洞。不過，更新檔要等多陣先會推出，而且無法遙距更新，必須派員到公司進行修正及安裝，意味著今回漏洞真係「好深入」呀。
