【有陰謀】 Apple 移除「 家長控制 」應用程式 原因竟然係？

世界衞生組織上星期發出指引，警告一歲以下小朋友唔可以接觸電子屏幕產品，而 2 至 4 歲小朋友每日亦唔可以睇多過一個鐘，否則會對小朋友發展有影響。家長為咗更有效率控制小朋友玩電子產品嘅時間，喺電子產品安裝 家長控制 應用軟件（Parental Control app）係其中一個最簡單嘅方法。不過，最近就有俄羅斯網絡安全公司，入禀控告 Apple 違法將呢類軟件下架，以打擊對手及壟斷市場！

打擊對手壟斷市場

近年唔少研究都指出小朋友用得太多電子產品，例如兩年前香港大學曾有一項調查研究，指出小朋友接觸過多手機、平板等電子屏幕類娛樂，會大大增加小朋友嘅情緒問題或過動症問題，風險較一般小朋友高 23.2%或 32%。會對腦部發展造成唔同程度嘅影響，不過，唔少家長為咗令小朋友乖乖哋食飯或為自己換取一刻嘅安寧，都會借助呢類電子奶咀去吸引小朋友嘅注意力，而為咗幫家長手控制小朋友用電子產品嘅時間，App Store 上就出現大量家長控制應用軟件，通過設定限制使用時間，減少家長同小朋友之間嘅拗數。不過，最近俄羅斯網絡安全公司 Kaspersky Lab 就喺入禀法院，以反壟斷條例指控 Apple 非法將具備控制屏幕使用時間嘅 app 下架，但同時間又批准由美國公司開發嘅同類應用軟件上架，好明顯係志在打擊對手嘅行為，扶植美國公司。

家長控制 過度取用私隱

到底係咪真係有咗壟斷市場？ Apple 早幾日終於作出回應兼否認指控。發言人解釋話今次呢批被下架嘅應用軟件，因為具備咗 Mobile Device Management （MDM）功能，會為電子產品用家帶嚟保安及侵犯私隱問題，所以先會遭受下架。 MDM 到底係乜？原來有公司會通過呢種功能，去管理員工嘅使用權限，等員工唔可以用嚟做啲唔安全嘅活動，例如瀏覽唔安全嘅網站、下載來源不明嘅檔案，減少電子產品中毒風險，繼而保護公司網絡嘅安全。

Apple 指出佢哋由 2017 年開始，注意到呢類型應用軟件存有大量漏洞，可以俾黑客入侵；由於某啲應用軟件可以俾管理者控制其他裝置嘅存取權限，包括讀取即時位置、開啟鏡頭、讀取瀏覽記錄，所以開始取締過度獲取私隱權限嘅應用軟件。不過，Apple 強調喺強制下架前一個月，會發信要求對方提供更新檔，刪除違例嘅功能同堵塞漏洞，只係有啲公司有反應而另一啲無回應，所以先強行將後者下架，並唔存在打擊對手嘅陰謀。

喺回應嘅最後， Apple 更加「語重心長」咁寄語家長唔應該因為擔心子女過度使用電子產品，而夾硬採用一啲具備安全漏洞嘅應用軟件，將子女置於風險之中。不過，到底 Kaspersky Lab 嘅家長控制應用軟件出現咗邊樣問題？係咪可以單單指出有保安漏洞或違限功能就得？睇怕都要等上到法庭先睇到佢哋嘅理據何在喇。

資料來源：https://bit.ly/2JbehYT 、https://apple.co/2UNxlPd

世衞指引下載：https://bit.ly/2J328FB

相關文章：【Apple中伏】蘋果公司確認所有iOS裝置及Mac機全中伏