【開心些牙】HIBP 檢查密碼外洩大法
用戶私隱資料外洩事件經常發生，而且閒閒哋都幾百萬筆資料外洩，究竟自己有無榜上有名呢？不妨試試用 HIBP （Have I Been Pwned？） 網站同埋 Google 推出嘅 Password Checkup 工具，就可以知道自己係咪有需要即刻換過新密碼喇。
HIBP 快速測試
「Have I Been Pwned？」網站係由微軟嘅安全研究人員 Troy Hunt 所製作，佢收集咗近年發生過嘅資料外洩數據，用嚟俾網民檢查下自己嘅電郵帳戶資料有無喺呢啲洩密事件上出現，現時記錄在案嘅受害電郵帳戶已有 78 億個，認真誇張。 HIBP 嘅用法超簡單，只要喺網站輸入自己嘅電郵地址，就會即時顯示呢個電郵有無曾經被洩漏過。測試過自己幾個常用電郵後，發現其中一個電郵帳戶原來喺 2012 年 Dropbox 洩密事件上出事，好在呢個電郵嘅密碼一早已經改咗，所以無進一步受害。
密碼被洩要即改
至於用開嘅密碼，到底有無被洩漏過呢？ HIBP 亦提供密碼查詢服務，只要輸入密碼，好快就會有答案，同時仲會話埋你知呢個密碼被洩漏過幾多次添！嘗試用最受歡迎密碼 「password」嚟測試，結果係差唔多被洩漏過 290 萬次多，果然好受歡迎。另外， Google Chrome 瀏覽器嘅用家，亦可以安裝 Password Checkup 插件，安裝後只會喺瀏覽器工具列上增加一個 icon ，如果你之後經 Chrome 登入任何帳戶，其中一個密碼曾經被洩漏過佢至會彈出警示，所以最開心當然係見唔到佢有任何反應啦。
資料來源：
