【有請小鳳姐】GandCrab 勒索軟件破解大法
GandCrab 勒索軟件自從喺上年一月出現，即刻成為網絡罪犯嘅至愛，不停利用佢發動攻擊，將受害者電腦入面嘅檔案加密，再勒索對方用達世幣（DASH）交贖款。 香港亦有唔少網民中招，時不時會有人喺討論區上跪求解鎖方法。
雖然由歐洲刑警組織等機構創立嘅 「拒絕勒索軟體」（NOMORERANSOM) 計劃已經喺上年十月推出解救方法；不過魔高一丈， 黑客又將 GandCrab 升級，先後推出 5.04 至 5.1 版本，再次吹熄受害者嘅希望之光。
而家有好消息， NOMORERANSOM 啱啱推出 update 版，不單可以解救各種勒索軟件，就連 GandCrab 最新版本都可以破解埋，如果有巴絲打不幸中伏，就要快快上 nomoreransom.org 下載破解程式喇。
