【分清黑客六種顏色】黑客唔一定「黑」?

    一般人聽見「黑客」兩個字就立即標籤佢係壞人。其實「黑客」,Hacker,泛指以任何手法入侵他人電腦嘅人。黑客有正有邪,更亦正亦邪。 入侵動機各不同,有為錢、為興趣、為學習、為國家、為理想,甚至為啖氣都有。Hacker 分好多顏色「帽子」,以下簡介 hacker 帽子顏色分類,以後唔好再「色盲」亂咁「扣帽子」。

    (第一部份)

    (大題)黑客六種顏色

    黑帽 Black Hat

    「黑心仔」黑帽亦稱 Cracker。通常「利慾」為目標,在非法的情況下攻擊系統,透過破解、入侵去獲取不法利益。黑帽係網絡罪犯,會hack 入某個系統盜竊數據,從而進行金錢勒索或賣畀黑市。黑帽嘅存在,令網絡世界好危險。

    白帽 White Hat

    「好心仔」白帽同黑帽完全相反,白帽又叫 Ethical Hacker(道德黑客)。不少白帽受聘於網絡安全公司或大企業,在完全合法的情況下攻擊系統、進行安全測試、找出安全漏洞,以「改善」為目標,令網絡世界更安全。白帽中亦有 Bug Bounty Hunter,專業「捉蟲」。

    灰帽 Grey Hat

    「自 hi 仔」灰帽亦正亦邪,介乎黑白。灰帽既不為錢,亦不為正義,以「展現」為目標,透過破解、入侵系統,然後公告天下,以炫耀自己擁有技術高超,此舉可能幫到該系統修正漏洞,同時有機被黑帽利用犯案。

    紅帽 Red Hat

    「激進仔」完全冇「小紅帽」嘅可愛,反而似英雄聯盟。紅帽以「正義」為目標,「伸張」嘅手段比較激進,會用「以暴易暴」手段制止黑帽,包括上載病毒、Dos 攻擊甚至入侵並摧毀對方部腦,最近日本自衛隊亦計劃「紅帽化」,授權向黑帽發動 DDoS 攻擊。

    綠帽 Green Hat

    「BB 仔」綠帽即係「好 Green」啦,綠帽泛指新手,「學習」為目標,立志成為高手,勝在上進好學,換句話即係問題多多。雖然好煩,但老手應該畀少少耐心提攜後輩,呢班綠帽小朋友係未來嘅棟梁。

    藍帽 Blue Hat

    「小氣仔」藍帽子絕對唔係正義之士,藍帽通常為乜?為啖氣!藍帽真係「復仇者」,通常以「報復」為目標,針對特定對象、企業而入侵網絡進行報復,除非被招惹,一般唔會主動攻擊他人。

    (第二部份)

    (大題)除了六種顏色,還有兩個另類

    黑客行動主義者 Hacktivist

    會 hack 嘅 activist,即係「網絡社運仔」,Hacktivist 被認為係擁有社會活動家身份嘅 hacker,一般以「政治理念」為目標,透過網絡攻擊引起政府同社會嘅注意,行動包括於目標網站主頁留低醒目訊息、嵌入激烈言論,甚至 DDoS 攻擊,由於動機不同,難以帽子顏色歸類。

    腳本小子 Script Kiddies

    即係「傻仔」,腳本小子本質上係一個貶義詞,形容個啲以「hacker」自居嘅初學者。同認真入行虛心學習嘅 Green Hat 唔同,佢地通常不學無術、認屎認屁,對電腦識少少扮代表,一般淨係識 DoS、DDoS 攻擊。Script Kiddies 連 hacker 都未必稱得上,冇資格歸類。

    (第三部份)

    (大題)識揀,梗係做白帽啦!

    著名黑客 Eric Steven Raymond 講過,想要在 hacker 世界裡面受人尊敬,唔系靠擁有其他人冇嘅嘢,而係靠你嘅貢獻,尤其係貢獻你嘅時間、創造以及技術成果。除咗份工作有意義,做白帽嘅收入受前景都非常吸引,識揀,梗係做白帽啦!

    白帽搵幾多錢?

    係美國,一名白帽平均年薪有 99,159 美金,大約為 78 萬港紙。

    Hacker 男多女少

    男 hacker 比例高達 92%,100 個 hacker 之中只有 4 個女性。

    業界新興工種

    目前,接近一半 hacker 擁有1-4年工作經驗,換句話說,依家入行未算遲。

    *數據來源:PayScale,2018.05

    #Hacker

    相關文章