IT業界資訊媒體

【私隱值幾錢?】暗網有價老麥都值 60 蚊

網上私隱外洩嘅新聞經常發生,下下都幾百萬幾百萬咁外洩,到底呢啲私隱去咗邊?係咪真係唔見咗就算?其實呢啲私隱真係有市有價,喺暗網上都可以買到呢啲資料,你以為淨係銀行帳戶、信用卡資料、身份證明文件先有得賣?原來除咗以上資料,就連麥當勞、AirBnB 嘅帳戶都榜上有名,仲值成 60 蚊添㗎!

根據外國網站嘅調查顯示,喺五大暗網嘅黑市上,都可以好容易搵到黑客售賣嘅個人私隱資料,除咗涉及錢銀嘅銀行、信用卡資料,同埋身份證明文件呢啲私隱外,仲有其他網站嘅帳戶登入資料發售,例如購物網站 Amazon、eBay,娛樂內容供應商 Netflix、Spotify,旅遊網站 Expedia、AirBnB,同埋餐飲業供應商麥當勞等等,記者綜合咗五大暗網嘅售價後,就計算出每個網站登入資料嘅平均價值,其實一般都係港幣 100 蚊以內就買到。

呢啲登入資料點解都會有人買呢?咪就係因為可以盜用其他人身份嚟消費囉,例如喺 Amazon 可以狂買禮物卡再喺自己帳戶內兌現,用其他人身份喺 AirBnB 訂民宿住,同埋可以去麥當勞瘋狂買包食,所以真係唔好睇少自己嘅帳戶資料唔值錢呀。順帶一提,要買齊成套個人私隱資料,原來大概只需一萬蚊,當然,如果係名人或富豪嘅帳戶,當然唔止呢個價錢啦。

資料來源:https://bit.ly/2DBg5qx