IT業界資訊媒體

【搵戲睇】10齣Cyber Security電影

其實與Cyber Security有關嘅電影唔單止多,而且一啲都唔悶。最新嘅有妙麗同湯漢斯玩社交網站,再早少少有Benedict Cumberbatch玩解碼。想有娛樂又有少少啟發?揀幾齣戲煲煲佢啦。Btw,仲有冇好介紹?

01)《The Circle》圓美圈套
Emma Watson + 湯漢斯 + 影射Apple、Steve Jobs、FaceBook都夠晒賣點,表面啲可以淨係J妙麗,深度啲可以反思隱私和人權問題。

02)《Anonymous a.k.a Hacker》 駭客交鋒
真人真事改編,烏克蘭移民為生計為屋企做Hacker,但係踏入black market之後,就梗係出事啦。片中唔少位令I.T.友有共鳴,唔算好悶。

03)《Open Windows》 開啟的窗口(台:雲端仇人)
少少鹹多多趣,唔洗點用腦。全片節奏明快,講述宅男FF ─ Hack入女星生活,少甜,然後鬥Hack,又綁架又陰謀,娛樂性以及女主角都ok豐富。

04)《The Imitation Game》 解碼遊戲
I.T.友必看!Benedict Cumberbatch粉絲必看!唔止向傳奇人物「電腦之父」Alan Turing致敬,更帶大家認真思考「社會認同」及「與別不同」嘅問題,推介!

05)《Snowden》 斯諾登風暴
有奧利華史東執導,比《第四公民》有戲味。就算你唔buy斯諾登,都不能否認此君為世界揭示咗一個好重要嘅議題 ─ 私隱同國家監控。美國都係咁,其他強國係點?

06)《Blackhat》 黑客特攻
有「雷神」、湯唯及王力宏主演,又有張兆輝、安志杰、黃光亮路過,再加埋大量香港場景如廟街、鰂魚涌、中環,典型荷里活堆砌,不能太認真,保證冇悶場。

07)《I.T.》 I.T.反監控
以IoT被hack作賣點,大家已經有晒共鳴,再加上《虎膽龍威:擇日開戰》導演以及鐵金剛皮雅斯布士南,就保證有埋身肉搏,緊張刺激,高汁荷里活動作片。

08)《Disconnect》斷了線
「螢幕發光無論甚麼都看」嘅年代,低頭族connect咗全世界,就係唔同身邊人connect。三個故仔剛好涵蓋網絡世界幾個議題,反思位ok到肉,值得一看。

09)《Reboot》
是咁的,ok靚嘅hacker醒來發覺隻手黐住部iPhone,上面有個倒數器,咁就好驚好緊張…40分鐘短片,少少cult。

10) 《Eagle Eye》鷹眼追擊
最後介紹呢部,因為劇本、導演、演員都計得好準,不多不少夠緊張、娛樂、豐富,夠穩陣。而且,十年前已經話你知IoT監控加上超級電腦,係可以好恐怖。

相關文章:
【網絡保安專家睇乜書?】10本好書推介