IT業界資訊媒體

【大件事】Samsung S10 漏洞 3D 打印指紋輕鬆解鎖

Samsung S10 推出接近兩個月,最受歡迎嘅莫過於佢嘅三鏡頭設計及夜攝能力,而且仲加入咗超聲波屏下指紋技術,聲稱解鎖準確度同速度都可以同時提升。不過,啱啱就有黑客成功破解咗 Samsung S10 嘅指紋保安技術,原理就係 3D 打印機主嘅指紋出嚟。破解咗指紋保安技術其實好大件事,因為而家好多人都會用指紋嚟做網上理財認證,唔見咗部機,真係隨時連銀行嘅錢都會俾人轉走晒㗎!

Samsung S10 賣點變漏洞

Samsung 嘅銀河艦隊 Galaxy 系列智能手機,如果唔係曾經因為發生過電池問題,連飛機都搭唔到,相信都仲係好多人嘅至愛。經歷兩代洗心革面之後,Samsung S10 暫時嘅用家評語都幾好。之不過其中一項賣點超聲波屏下指紋技術,上星期就俾一個叫 darkshark 嘅黑客成功破解,佢將解鎖片段放咗上 imgur 平台,展示整個解鎖過程。

首先 darkshark 用手機影咗自己印喺紅酒杯上嘅指紋,然後放上電腦用 Photoshop 推高對比度令指紋更清晰,之後再用 3ds Max 嚟製作 3D 指紋圖像檔案,最後再用 3D 打印機打印出嚟,除咗第一次唔記得要水平反轉指紋同第二次立體打印嘅厚度不足之外,第三次佢就成功呃到 Samsung S10 ,解鎖入到主畫面。

而家好多手機用家嘅理財 app 都會選用指紋嚟做認證工具,貪指紋保安度夠高。點知竟然咁易被破解到,你話唔驚就假。以為執到機都仲要攞到你指紋先會出事?其實只要你平時唔係戴住手套玩手機,又或者習慣時時刻刻都抹到部機一紋不染,否則只要你一唔見或俾人偷咗部手機,你嘅指紋已經同時送埋俾對方,識驚未?

資料來源:https://imgur.com/gallery/8aGqsSu

相關文章:【人臉識別有幾安全?】測試:3D「假面」vs 五款手機解鎖系統